中環在線 - 李華華 2018年8月27日
中環在線：冼國林切除左眼「得五分鐘考慮」 - 李華華
第一信用（8215）前主席冼國林（圖），近來相當運滯，既有股權糾紛，又突然患上重病，需切除左眼，幸現時大步檻過。金融界人士話，佢病發嗰陣，係去緊濟州島，雖然已經發燒，但堅持成行。起行時坐嘅私人飛機，正是由低調富豪葉家海（Allan Yap）擁有。
坐葉家海私人飛機
葉家海為人低調，佢被公認係「殼王」陳國強嘅親密戰友，喺股壇上有千絲萬縷關係。例如殼王早年控有上市公司錦興集團（275，現稱凱華集團），後來佢賣甩錦興控股權，接手人正是葉家海。陳國強喺入主電視廣播（511）後，亦曾經搵葉家海做自己嘅替代董事，印證兩人之間嘅互信相當高。葉家海都跟過老闆，𠵱家就自己係老闆，擁有私人飛機。而知道冼國林出事後，傳聞佢搵人幫架飛機進行大消毒。
冼國林病情相當凶險，知情者指病毒「由骨發出嚟」，上到眼。據知醫生要求他在五分鐘內決定：一是切一隻眼，一是兩隻眼都盲曬。其實即是無得揀，手術後他老婆收起其手機，免得冼國林掛住工作，未能安心休養。
李華華
mailto:LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
