【實力取勝】熊熊熊熊熊熊熊（陳承龍）（第194期）
2018-9-13 18:34:40
真係好熊，呢排個市，有反彈都係超賣反彈，都跌咗咁多日咯，冇理由唔彈丫，不過市底真係弱雞，9月都係熊曬佢，一彈又開熊，唔好同佢客氣，首選騰訊（700）同港交所（388）。「熊霸天下」係小弟呢
幾日嘅投資宗旨，要牛嘅朋友，寧願去食牛肉飯好過搏牛證。一日特朗普未推出個2000億關稅清單，個市一日都唔會好。
高危嘅，仲有一批高市帳率（PB）嘅股，包括中國燃氣（384）、華潤啤酒（291）安踏體育（2020）同恒大健康（708），當中以華潤啤酒有機會殺得最勁，因為個股價都托咗喺高位好耐。
呢排唯一好樣啲嘅大股，就係阿正成日講嘅恒生銀行（011），睇佢三年圖仲Keep住喺完美升軌之上，不過呢，個市再熊落去，公用股同恒生都可能難逃一跌，大家小心啦，寧願忍手都唔好亂開牛。
大股衰之餘，細股都有反應丫，好似寫稿今日，之前推介嘅中能控股（228）一度升過三成，唔太差。另外，隻歡喜傳媒（1003）都OK，公司宣佈同貓眼訂立補充協議，雙方同意將合作協議嘅有效期自2018年9月2日起延長兩個月，並可經各方書面同意後進一步延長，但「歡喜哥」嘅重點，都係等佢入深港通，依家市值49.83億元，保持到平均50億，兼有足夠成交量，基本上都入硬。
總之大家睇路，唔好亂嚟。
實力取勝 - 陳承龍 舊文
來源 source: http://www.winmoney.hk
