買貴票入護城河未必抵
2018年09月13日
風球高掛，但暫時對香港威脅有限，股市繼續開，指數繼續跌，喺淡風吹襲下，資金尋找避風港，公用股成為最出色板塊。中電(002) 升2.4%，收報94.55元，半公用股港鐵(066) 升2.5%，收報40.75元，為表現最好藍籌
股，呢個亦可以理解為股海風高浪急。
股海浪頭拋咗幾日，中美貿易無解決跡象之餘，市場擔心雙方不斷加注，令情況惡化。美國外交關係協會高級研究員Edward Alden出席論壇時表示，美國總統特朗普將不斷通過各種方式，打壓中國經濟。中國在G20峰會之後國際地位提升，亦難言輕易妥協，貿易戰發展已經愈演愈烈。喺咁嘅情況下，雖然美股造好，本地資金避險意識不斷增強，令各類股份估值收縮，只有盈利有保障的公用股能夠維持。
基金劏新貴不手軟
基金昨日套現目標落咗喺醫藥股之上，今個星期做咗恒指新貴的中國生物制藥(1177) 被開刀，開市無耐股價已經插咗一成，之後跌幅擴大，收市急挫14%，收報7.5元；另一隻藥業股石藥集團(1093) 都跌近10%，收報16.7元。
中生制藥今個星期成為恒指新貴，作為成份股，佢股價過去一年波動都幾大。喺去年七月，佢嘅股價仲喺5元水平浮沉，隨著醫藥股當炒，股價大幅炒上，甚至逆市升上高峰去到13.9元，但第二季尾股價開始掉頭，跌勢都幾急。今個星期佢加入成份股前，股價已跌近9元，喺好消息成真下，呢兩日股價反而趁勢插落嚟。
中生制藥喺藥股中，算係相對有基本因素的一間，無論自己製藥抑或投資同業表現都唔錯，喺當炒時被視為優質增長股。O依家市場風險胃納大減，呢類股份吸引力下降，雖然佢股價調整咗唔少，市盈率仍然有31倍，息率只有0.7厘。按我早前講的用語，呢類缺乏護城河保護的增長股，成為基金沽貨的目標，尤其係累積升幅大的股份，套現鎖定利潤誘因更大，沽起上嚟無手軟。其他醫藥股都受牽連，康哲藥業(867) 收挫12%，報11元；三生(1530) 、復星醫藥(2196) 同石四藥(2005) 都插咗7至8%。
美團貨源集中拒平賣
早前我提過股神巴菲特形容，買股要買有堅實業務的股份，猶如有護城河保護的要塞，Tesla創辦人馬斯克形容，呢啲只顧防守的公司好易畫地為牢，缺乏進取。但好明顯，喺天朗氣清，秋高馬肥的日子，做遊牧民族四處獵食的確好爽，但當風大雨大之時，大家就想搵個有護城河的堡壘匿埋，好似中生制藥呢類高估值、低派息，無乜險可守的股份紛紛失寵，資金流入公用股呢類護城河又深又長的公司。
對於買貴票走入有護城河的公用股，陸羽仁認為呢個係基金行為，因為基金有投資壓力，唔可以全揸現金，所以市況唔明朗時寧願買公用股，但如果經濟惡化，公用股雖然收入穩定，但賤物鬥窮人，都一樣有可能下跌，所以散戶唔睇好後市，不如索性持有現金，或者進取啲實行倒轉炒，將啲倉底貨先沽後買走短線。
喺市場缺乏入市興趣下，恒指再跌，收報26345點，跌77點；國企指數收報10238點，下滑94點，成交948億元。大行摩根士丹利發表報告指，因人民幣貶值、房產交易量、貨幣供應量和GDP等宏觀因素均呈現下行趨勢，可能導致濠賭股於2018年至2019年盈利預測向下修正。美高梅(2282) 收挫7%，報11.16元；永利澳門(1128) 挫6.4%，報收17.12元；銀娛(027) 收挫5%，報45.7元。
在港第二隻「同股不同權」股份美團點評(3690) 招股期間，個市幾乎跌足咁多日，截止認購後初步傳出公開發售僅獲得1.5倍左右認購，國際配售部份獲得超額認購。外電引述知情人士，新股會以60元至72元間的中上限定價。
喺咁嘅市況下，上市仍然用中上限價認購，可能出乎捧場客意料之外，焗畀高價，但由於超購咁少，股價高度歸邊，跟住睇睇佢下周四出世咩環境。
陸羽仁
金融High Tea 舊文
來源 source: http://hdfin.stheadline.com
