樓市要等特首發落
2018年09月26日
中秋節假期港股停開，周一美國向2000億美元中國貨加徵10%關稅正式生效，中國亦反徵600億美元美國貨關稅，港股美國聯儲局於周二開始議息下受壓，恒指之前四個交易日反彈強勁，在中秋休市前回調，算是正常表現。同樣，美股同內地股市喺議息
有結果前回吐，杜指收報26562點，跌咗181點；納指收報7993點，升6點；標普500指數收報2919點，跌10點。內地A股偏軟，上證指數收報2781點，跌16點，深成指數報8353點，跌55點。
港股回調除了中美貿戰外，相信同美國議息都有關。上星期本地憧憬加息，令港匯轉強，吸引資金流入，到周一本地銀行同業拆息全線上升，市場情緒又開始有啲緊張，地產股同內房股壓力都加強咗。各種拆息以短錢升幅最大，反映超短期資金成本的隔夜拆息急升2厘，升至3.852厘。一星期拆息亦升1.37厘至3.267厘。與供樓相關的一個月拆息升穿2厘，至2.169厘，上升27.7基點。
覓地小組舉手棄權
市場由炒利率上調吸引資金回流，轉而見到拆息有啲腳軟，一個原因係兩日假期發展商無乜大盤推出，同時幾個收緊票的新盤，登記都比較慢熱。有個由內房商推出的屯門盤，定價號稱每呎唔使一萬元，係呢兩年內少見四位數字呎價的新盤，比鄰區新盤定價為低，唔排除喺加息陰影下，新盤銷情會受影響。
中環茶友話，美息上調影響供樓，初期只係心理因素居多。本地發展商銷售手法一向超強，喺呢啲環境通常會維持秩序，有可能拖慢售樓步伐，等買家餓盤。O依家多咗內房商加入戰團，佢哋作風唔同本港地產商，作風傾向薄利多銷，搶佔市場。
另一個心理影響來自覓地小組提交咗報告。呢個小組用咗大半年做調查，經常被外界質疑無用。特首林鄭月娥索性唔等佢交功課，準備在10月的《施政報告》出招。O依家由小組主席黃遠輝做的初步觀察，做咗幾個無傾向性的結論，先出一個報告畀政府，等如係舉手棄權，總之特首話乜就乜。外界焦點因此去咗下個月10號宣讀的《施政報告》，究竟有無乜嘢打擊樓價或實際紓緩措施。
喺美息上調同樓市等待特首發落下，恒指周一收報27499點，挫454點；國指則下滑199點，收報10827點，成交693億元，所以跌市主要係無乜買賣意欲，小量沽盤就推低咗指數。當中本地地產股普遍下滑，公佈好業績後升得多的新世界發展(017) 回吐2%，收報10.74元；長實(1113) 收跌1.9%，報59.6元；九倉置業(1997) 收挫2.9%，報51.65元。
中央放水前要壓內房
同樣對息口敏感的內房股，假前沽壓都大。呢個板塊仲多咗個因素，有消息話中國住建部要求廣東等六省對商品房預售許可進行深入研究論證，廣東仲話醞釀逐步取消預售樓花制度。
市場憂慮新一輪調控風險，內房股全日捱沽，碧桂園(2007) 曾大跌逾8%，收市跌5.6%，報10.84元；華潤置地(1109) 走低4.8%，收報27.95元；恒大(3333) 斥145億元人民幣入股廣匯集團，收跌3.6%，報25.8元，中海外(688) 跌3.3%，收報25.3元。陸羽仁睇法仍然係，內地想放水撐經濟，卻擔心會引發樓價爆升，故此不斷出招勒緊樓市。呢個狀況令內房股會上下波動加劇。長遠會對抗逆能力強的大公司有利，但係過程中股價會好反覆，投資者較宜用手頭的倉貨炒波幅，用新錢去買則要小心睇路啦。
阿爺或車市出招
另外，花旗發表研究報告，指留意到市場關注政府對汽車業，會否重啟類似2015年9月減免50%購置稅的直接刺激政策，但該行認為，出台直接刺激政策機會較低。該行調查數據顯示，政府正考慮對汽車製造商提供間接支持，當中包括減低增值稅等。
陸羽仁
金融High Tea 舊文
來源 source: http://hdfin.stheadline.com
