智取大市：殼股大滅絕之後 - 晉佳
證監嚴打殼股，下次升浪時，殼股已生物大滅絕。
資料圖片
騰訊（700）周五升8%，創下2015年7月9日到𠵱家最大單日升幅，當日係港股大時代後7月股災嘅第一個谷底反彈日，當日騰訊急彈8.3%；至於再上次紀錄，就係2011年10月6
日歐債危機見底日之後嘅首個反彈日，單日升11%。當然，唔計騰訊，整體港股報復式反彈力度遠不及上述兩個見底反彈日，原因係今次慢熊短線跌得冇咁急，反彈亦相對冇咁急。
另一方面，投資者對跌市司空見慣，唔容易再出現恐慌性跳樓價，即使內地投資者比例高，但受過連番股災洗禮，中港投資者面對逆境經驗多咗係事實，港股市場會更趨向成熟，高低位亢奮同恐慌情緒形成嘅股市走勢，將不如以前極端。
港股另一個更趨向成熟市場嘅徵兆，係證監嚴打殼股，下次升浪時，殼股已生物大滅絕。不過，殼股死去，相信大陸有錢盲毛猶在，資金總要搵出路。
上一浪既然民眾金融（279）都炒得起，反映盲毛資金仍願意追捧冇質地可言嘅細股。一批50億樓上、有實質業務、不起眼而股價長期沉寂嘅港股通標的股份，個別喺下一浪可能成為盲毛追捧目標，北水持股比例一直上升、股價逐步買上係特徵。反正港股通持股比例係做功課係必睇，mon實包冇衰。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
