異動空間：最悲情港股指數 - 魏力
創業板指數已創至少15年新低，一個被政策邊緣化到盡頭的板塊，未來隨時灰飛煙滅。
資料圖片
熊市之下，連股王都跌到七個一皮，如果加埋政策打壓，後果顯然不堪設想。魏力想講的不是教育、醫療、燃氣股，而係土炮創業板。可能大家好少留意，創業板指數已創至少15
年新低，與52周高位比較勁瀉44%，一個被政策邊緣化到盡頭的板塊，未來隨時灰飛煙滅。
創板72隻成份股，最大市值不過87億銀，最細僅2,790萬元，高鐵站樓上是但搵個單位，銀碼分分鐘都大過佢。至於市值中位數僅4億，更有11隻市值不足1億元，佔整體15%。講盈利，去年賬面有盈利的公司得19隻，當中更只有2隻肯派息。盈利、交投持續低迷，集唔到資之餘，又隨時面臨被DQ。現行政策下，太細隻好易被out，而市值好大、但長年虧損的就是「新經濟股」，上市無任歡迎。就今年來講，邊類股份先會令投資者輸大錢？答案顯而易見。
講番個市，上日一棍純粹超跌反彈，觀乎周五美股三大指數大上大落，埋單都係收陰燭，實非好兆頭。今番美股冧市與估值太貴有關，美國債息上揚為大趨勢，買股引誘越來越低，加上減稅、貿戰、油價三大因素，通脹大機會繼續上，故此今輪唔會係三幾日就調整完。A股低迷、美股閉翳，港股又如何獨善其身？
魏力
http://fb.com/2012jason
本欄逢周一、五刊出
異動空間 - 魏力 舊文
來源 source: http://hk.finance.appledaily.com
