財路 - 錢雋 2018年11月20日
財路：北控水務潛力勁厚 - 錢雋
北控水務對上母系牌頭夠厚，業務發展有優勢。互聯網圖片 適中字型 較大字型
中港反彈市，資金由大價嘢開始，一路向下搵嘢搞，水務股仲未點彈，當中北控水務（371）啱先創三年低位冇耐，預測PE得7倍，行內至抵搞。
北控水務到今年6月尾，喺內地擁有運營中嘅汙水廠249座、8座再生水處理廠，同73座自來水廠，集團水廠覆蓋範圍，已經擴展到21個省、5個自治區，同兩個直轄市，講曬士規模，一啲唔削。又北控水務對上母系牌頭夠厚，喺業務發展優勢，北控水務彈出嚟。
再睇集團同呢瓣中、短線發展。德銀報告話，北控水務上年攞得約500億元人仔PPP項目，有部份喺再談判後，投資額度減半。集團另會透過中央採購方式，爭取較低電價終極目標減少2/3淨水廠人手。透過成本管控，提升收益。
而就水務瓣數，場內估計，隨住阿爺透過基建項目，支撐經濟，會加快呢瓣投資。又總理李克強前排亦講過話，中國家陣城鎮化率，得58%左右，而城鎮汙水設施建設，係城鎮化建設基礎的基礎，勁有投資潛力。而德銀係撰寫北控水務報告中，就引述北控水務話，預計內地喺未來5年到10年，會投資約15萬億元人仔，提升水質，而淨水廠同水管相關投資，亦會達到6.5萬億元人仔。睇到係，水務事業喺內地潛力勁厚，北控水務肥仔水。
場內專業預測，北控水務2018年到2020年EPS 0.5元、0.56元同0.63元，預測PE8.8倍、7.9倍同7倍，場內水務瓣數當中，集團PE係至抵之列。博北控水務彈，以2020年10倍PE做目標，現價4.35元現升45%，到6.3元，呢個PE水位，一啲冇過火位。
錢雋
細價股專家
本欄逢周二刊出
財路 - 錢雋 舊文
來源 source: http://hk.finance.appledaily.com
