大棋局 - Mr. Tregunter 2018年11月20日
大棋局：中國缺口即將打開 - Mr. Tregunter
美國今年挑起的貿易戰，目的就係要打開中國缺口。資料圖片 適中字型 較大字型
無論係清末的鴉片戰爭還是2018年的貿易戰，都有一個核心，就係要打開中國缺口。上一個時代，係西方先進國家利用發展中國家廉價的勞動力、土地資源、環保成本，去攫取利益；下一個時代，中國已經有錢，西方先進國家要嘅係市場。過去中國唔敢放手開放，因為對新自由主義、華盛頓共識有忌憚，講白啲即係驚唔夠爭，但現下已去到無法再拖的地步。
月底G20特朗普、習近平會晤在即，市場傳出中國要實落開放保險業。路透11月19日報道，據直接知情人士稱，中國將於明年初接受國外保險公司控股中外合資公司的申請，甚至考慮提前開放外資持股比例限制。今年4月，北京方面已講過會開放證券公司、基金管理公司、期貨公司、人身險公司的外資持股比例上限至51%，3年後不再設限。但幾時落實？唔知。路透的消息指，關於合資保險公司，中國監管機構最快於2019年第一季度發佈最終規定。
過去外資保險公司想嚟做生意，要同中國公司合資，外資最大持股50%，即唔可以做最後話事人。倘2019年放寬持股至51%，就可以話事；3年後2022年，可以買起成間公司。
特習會晤料有好消息
這一點改變，對中國影響非常大。封建時代封邑食祿，現代中國封企食祿。巨型國企之領導，其實就係一方諸侯。合資公司若屬與國企合作，當外資可以持股51%以上，意味該公司之主要人事任命就唔再到共產黨話事，此其一。
市場經濟係市場需要乜嘢你做乜嘢，計劃經濟唔係。中國現下處於兩者之間，其做法係，部份產業可以市場經濟，部份產業對管治有影響的，唔可以行市場經濟。唔行市場經濟的企業賺唔到錢點搞？就由賺到錢的企業補助，例如上層指令畀單你做、同你落廣告。當中國陸續開放，唔行市場經濟的企業越來越難做，有收縮之虞，控制力便下降，此其二。
當下中國正利用修改公司章程的方法，鎖實各種控制權。例如修改條款，讓黨掌控營運及投資的最終決策權，甚至要求由黨委書記擔任董事局主席。如果表面話開放外資持股上限，實際由黨委書記做睇場，即仍然玩緊表面睇佢係個風筒，其實係鬚刨嘅手法。這將是中美接下來爭持之處。
G20特、習會晤相信會有好消息，形勢使然，大家都需要沖喜一下。但就如80年代美日之爭，簽《廣場協議》一刻，其實只係開始。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com
