中環在線 - 李華華 2018年11月26日
中環在線：創夢記招 猷君唔怯場 - 李華華
創夢噚日舉行IPO記招，猷君（左）以首席營銷官身份登場。 適中字型 較大字型
每年賭王何鴻燊生日，各房子女都會「車輪式」上前祝賀。上年四房超盈同猷君喺Ig上載生日相，當中四太如常送「肉嘴」摸面放閃，冇乜特別，但今年就唔同啦！
加入幾個月 做首席營銷官
噚日係賭王97歲生日，咁啱猷君擔任首席營銷官嘅創夢天地（1119）舉行IPO記招，見猷君喺台上表現淡定，面對記者提問一啲都唔怯場，記招到尾聲，佢就賣曬口乖話，每個父親嘅心願都係望子成龍，同埋唔使再擔心個仔，話自己𠵱家就嚟24歲，噚日係爸爸生日好開心，今年畀佢最大嘅生日禮物就係招股書。
「能夠參與上市，對於父親嚟講應該係一個唔錯嘅成績！」猷君話做完嘢之後就會跑去同Daddy賀壽，講完即衝出會場。冇幾耐，記者就影到猷君同媽咪四太一齊去養和醫院，見佢仲攞住本招股書，「呢本係我人生第一本招股書，所以特登攞畀Daddy睇」。
猷君今年2月加入創夢，唔夠一年已經做到成績出嚟，睇嚟賭王都十分滿意。猷君噚晚即刻喺微博更新：「每年給你準備禮物都是最頭疼的事情，今年我終於能夠給你一個特別的、最有意義的禮物！」
李華華
mailto:LiWaWa@AppleDaily.com
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
