【異動尋寶】睇啱方向照輸錢實例（魏力）
個市一等期結，二等「習特會」，企埋一邊食花生，少造少錯。炒股好幾年，「睇啱方向照輸錢」可說閒過立秋，上星期五又一實例，分享畀大家笑嚇。
上星期，個市繼續行「收窄三角形」，11月初以來的反彈浪，相信小弟係第一個講會行「收窄三角形」，當日係11月5
日，恒指之前三日爆升1900點，去到26500點，當日一街睇27000，魏力在網台訪問就話，個市會回，波幅會收窄，最大可能係行「收窄三角形」。家陣睇番，基本上中哂。但炒股票就係咁，方向中有鬼用，中間上上落落，把持唔住就會做錯決定。
上星期五（11月23日），魏力中午出咗個post，叫減貨。原因係「阿爺不行了」，滬綜指跌穿上升軌，轉弱了，創業板都穿位了，得番深成指好少少，但相信都唔頂得耐。A股唔得，美股又弱過弱煲，油價又崩盤，港股好正路去諗，是不能獨善其身。魏力當日都身體力行，減了三分二倉。
出post無耐，已經收到留言問：係咪可以開put？當時魏力其實也有造淡念頭，但轉弱訊號未夠明確，想來想去，都係多等兩日再算，於是引用星爺《回魂夜》金曲回覆：七孔流血還七孔流血，死是死，兩樣嘢不能混淆。意即減貨，但不開put。
近排有爬開小弟文章應知道，我觀點係行完收窄三角形之後，較大機會向上突破，所以本身近排都加番唔少貨，又減了一些反向ETF。去到上星期三晚，市場傳出「美聯儲明年春季會暫停加息。」當時心諗：呢次無死！一定挾！點知，星期四唔鬱，星期五又跌。
「係咪大戶借消息托住出貨呢？點解個市唔行呢？」自己開始懷疑自己，會唔會睇錯市，後市爆落呢？有貨自然有壓力，特別係部份持股已有虧損，「依家唔走，下星期gap down咪大鑊？」於是乎，㩒制沽貨。
去到星期一開市，就知自己被震走了，本地地產股爆上，原來大戶等到今個星期，先開始借減慢加息做藉口，推個市上去結算，可說是始料不及。恒指由26200一路推上26400，魏力望住個倉，雖然仲有些少貨，但都係得一句話：我空虛，我寂寞，我凍……
上週五一役，好彩的是無落手造淡，但明明睇啱方向，都要自己嚇自己，最後無錢賺仲止蝕了部份持股，這次經驗要好好記住。炒股，最大敵人還是自己。
www.facebook.com/2012jason
異動尋寶 - 魏力 舊文
來源 source: http://hk.finance.yahoo.com
