智取大市 - 晉佳 2018年11月28日
智取大市：賤價科技股啟示 - 晉佳
近期科技股不濟，同程藝龍只能以低估值上市。圖為同程藝龍首席執行官馬和平。 資料圖片 適中字型 較大字型
港股明年何去何從，與其睇住唔知點玩嘅貿易戰去估估嚇，不如去到12月再睇定啲好過。暫時睇，最近業績令市場滿意者嘅股份同埋低估值股份較受歡迎。
同程藝龍（780）半年經調整純利6.5億人仔，係美團（3690）嘅半邊對手，由騰訊（700）做最大股東，呢個市況只能以200億港幣多啲上市，估值相當不進取，結果守到招股價之餘炒咗兩日，目前260億市值左右。
另外，FT報道，AI晶片股嘅地平綫想上市集資10億美金，估值預計得3至4億美金。講緊地平綫專做人臉辨識用嘅晶片設計，懶高端得嚟，監控鏡頭遲早玩到全中國都應用，本來呢啲股有AI概念點都唔會上市益街坊，𠵱家話上市，都只係賣到呢個估值，當然唔係咁簡單。
上述兩個例子，反映科技概念股要用低估值上市，道理易明，相信因為之前全球科技股升到嘭嘭聲，累積超多資金押注喺科技股之上，但科技冷戰發酵得太快，要散貨都散唔切，實在難以再吸納再多嘅科技股。近排本地地產股、滙控（005）甚至中移動（941）都跑贏，相信係科技板塊持倉過重，要將部份資金搬去傳統股份換馬所致。散戶靈活過基金，可以揀，就毋須勉強跟買基本因素平庸嘅傳統股份了。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
