科網新股炒水位
2018年11月28日
中美兩大巨頭「埋牙」前，港股觀望氣氛濃厚。雖然美股造好，但香港因已先升為敬，所以成日都係牛皮待變。不過中美領袖喺G20峰會會面前夕，美國總統特朗普又發功，話如果冇協議，就會喺明年1月起對2000億美元中國貨加徵25%關稅，股市唔跌都算硬淨。
呢期大市交投下降
，主要係成交多嘅科網同手機股股價不振，造成市場失焦。喺呢個狀況下，兩隻科網新股掛牌，已經算係熱鬧，當中第二日掛牌嘅同程藝龍(782) ，一度飆上13.38元創新高，然後回調至12.62元，升1.8%。至於昨日首掛嘅寶寶樹集團(1761) 就冇咁叻，收報6.87元，較上市價6.8元，升0.07元或1%，不計手續費及佣金，一手500股帳面只賺35元。
贛鋒貴上股價先撻後彈
陸羽仁同一位科網股天使投資者傾起，他慨歎現時上市海鮮價，條數好難預。天使投資者等公司上市收割，基本上係賣多過買，市況咁波動，如果唔想平賣就要等，但現時排隊上市公司咁多，大家都唔想等，所以有啲公司心態係賣到幾多得幾多。喺呢個環境下，科網股供應增加，喺主板接貨嘅投資者其實唔好過。有統計指，今年熱賣嘅新股，如今基本上係蝕錢居多。喺呢個情況下，認購新股又有乜要留意呢？
呢位天使投資者坦言，若然要認購新股，首要就係睇市況。因為投行定價需要時間，若然定好就唔會改，所以如果定價時市況高，咁招股價就唔會平。另一個因素，就係公司要價係咪去到盡，有啲公司或大股東願意讓利，定價就吸引啲，咁上市就有水位。
另一個相反例子係做鋰深加工嘅企業贛鋒鋰業(1772) ，公司首掛收市價，較發售價16.5元勁插28.7%，每手200股帳面蝕948元。出現呢個狀況，係因為集團喺內地A股先上，由於炒作電池業需求前景，去年股價大漲倍幾，加上當時市況好，於是定價好高，但來到香港境外投資者覺得佢係上游業務多，當係周期性波動股份，估值遠低於內地，於是一上市就破底。而且公司第三季盈利得2.69億元，按年下跌31.98%，對估值亦有影響，令到股價急撻，到消化完一輪，股價先至推番上去。
好似同程藝龍和寶寶樹，兩間公司定價時個市差啲，所以橫向比較同類公司時，定價時大市相差咗一至二千點，加上公司作風較有彈性，所以同程掛牌可以有超過20%水位走。不過佢提醒，買新股要買到大升嘅好嘢，多數係要市況由波動轉向平穩，資金源源流入，咁新股先可以炒得浪比浪高。若然市況上上落落，基本上食完市況差距同讓利水位，就差唔多要食胡，所以炒新股基本上都係一樣，喺現時市況下唔可以期望過高。
主席攞威騰訊股價沖喜
科網新股呢排有水位走，同騰訊(700) 表現回穩有關。呢排公司似乎出力平息外界對前景憂慮，喺香港同澳洲舉行四日非交易路演，管理層分享多個業務前景，料廣告及雲業務可以成為結構增長動力。今次路演據報係BNP百富勤上周安排，騰訊管理層期間透露，計劃轉戰企業市場，相信未來非遊戲業務，將為集團帶來更多收入。
雖然受累內容及營運開支，騰訊利潤率將會受壓，不過，BNP百富勤發表報告指，騰訊長線仍具吸引力，建議「買入」，目標價355元。加上日本《日經新聞》報道，騰訊將與日本聊天應用程式營運商LINE合作，為日本中小型零售商提供微信支付服務。
不過，有人笑言，搞咁多嘢加埋路演威力，可能唔及主席馬化騰獲頒開放改革百名人物，消息可能有沖喜用，股價急升近2%，收報303.8元，重上300元心理關口。
除咗個別新股，港股交投仍然低迷，成交金額784.09億元。恒指收報26331點，跌44點；國企指數收報10515點，跌6點。康師傅(322) 績後遭券商唱淡，食品股整體受壓，康師傅股價低見10.34元，收瀉17.74%，報10.48元；統一企業(220) 被美銀美林下調目標價，股價收插12.5%，報7元；旺旺(151) 收跌1.69%，報5.81元。華潤啤酒(291) 則跌5%，報26.85元。
陸羽仁
金融High Tea 舊文
來源 source: http://hdfin.stheadline.com
