智取大市 - 晉佳 2018年12月17日
智取大市：年尾美股大考驗 - 晉佳
特朗普近排成日Twitter發好消息，但係美股係咁跌，好得人驚。 資料圖片 適中字型 較大字型
美股道指跌穿下跌三角形再完成後抽再跌，以一個非常不利嘅形勢作為一周完結。年尾美股消息特別多，張首晟自殺、孟晚舟被捕、中國訂嘅荷蘭ASML光刻機被燒毀等等嘅科技戰消息不計，仲有特朗普被彈劾風險大增至五五波，因通俄門令特朗普陷入違反選舉財務法等等，連番面對刑事調查，一單接一單，同樣打擊美股表現。
就算特朗普話中美貿易協議即將落實，好明顯投資者唔信中美關係有真正轉機，美股個圖已告訴大家，即使唔清楚邊方面先係潛在引發跌市嘅因素，美股投資者都偏向避險。
12月美股投資者係咪提早走為上著？下半月波動性係咪保持咁大？仲有一項變數，就係中美會否如特朗普所說，有具意義嘅貿易協議誕生，有嘅話可以挾上一轉，然後好消息反映咗，又會跌過，但可能有條件令年尾回穩、平靜一點。
話說特朗普喺聖誕檔期，由12月21日放假至1月6日先返，總共放16日大假。有貿易協議的話，會否喺12月20日（美國時間周四）或之前公佈？值得留意。至於特朗普的Twitter，不嬲喺大假期間照常營業。當特朗普近排成日Twitter發好消息，但係美股係咁跌，係咪仲得人驚先。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
