笑到最後 - 高明 2018年12月17日
笑到最後：龜速運行的樓災 - 高明
如果樓市政策不變，有可能用好長時間出現一個樓災級嘅跌幅，全部都以龜速進行，冇驚喜，慢慢嚟。 資料圖片 適中字型 較大字型
特首林鄭月娥上星期指出，幻想政府會因樓價下跌出招救市，「可以慳番」。現時香港政府可以做的救市手段，不外乎是減辣，然而，若果真係減，恐怕樓價會跌得更急更多。
由於政府真正救樓市嘅措施係減息，但息口方面香港政府冇乜話事權，最多勸喻嚇銀行跟足啲美息，退而求其次，所謂救市嘅選項，就只有減辣。不過，辣招嘅原理，正如本欄幾年前力排眾議，指出辣招令二手供應大減，係樓價挾升元凶，辣招越收得緊，樓價越好挾，今年上半年更出現二手放盤任嘜價現象。
喺呢個原理之下，減辣只會造成一個結果，就係樓價下跌。因為樓價升到呢個水平，除咗少部份今年高位接貨業主賬面蝕本外，大部份人都仲贏緊，唔賣除咗有自住嘅考慮之外，重置成本係另一大考慮，高位賣咗，跌得唔夠多，第日買返交完稅白做，不如唔好賣，辣招反而喺劈價潮中穩定一部份貨源。不過，樓價歷年以倍計升，同樣大把人等住食糊，有辣招先一動不如一靜，假如減辣後重置成本降低，現時二手成交咁低，一少部份人食糊，已經足以質低樓價。
至於樓市走勢點睇，應從港股之中搵靈感。今年恒指從高位下跌最多8,944點，以跌幅而言肯定係股災級，但為何坊間完全感受唔到股災發生？因為呢接近九千點的跌幅用好長時間、偶有反彈嘅形式進行，活躍參與者全年贏嚇輸嚇咁，全年埋單即使輸錢，但冇一個星期暴跌咁大心理創傷。
同樣道理，如果樓市政策現況不變，有可能出現如港股一樣嘅走勢，用好長時間出現一個樓災級嘅跌幅，因為跌得太慢，亦減慢咗公司裁員嘅步伐，保住就業繼續供樓。過去大家以為突如其來嘅金融危機，今次全部都以龜速進行，冇驚喜，慢慢嚟。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.finance.appledaily.com
