大戶議息前扭計
2018年12月06日
美股前晚大插，香港股民若然有追貨都有啲腳仔軟，大市結果低開後徘徊，收市跌咗440點，跌幅少過預期，反映市底都唔係咁壞。
華爾街前晚拋風四起，原因有兩個，細細哋嘅原因係美國總統特朗普同國家主席習近平見完面後，出嚟大聲讚好，可惜白宮
官員口徑唔一致，甚至連邊個會做以後嘅談判代表，都有啲講唔清。美國市場開始擔心兩國貿易關係再有波折，但從本地股市聰明資金嘅反應，似乎唔係咁擔心。
美股跌突 港股算硬淨
另一個大大哋觸發美股下跌嘅原因，係美國長短期債券利息出現倒掛。正常而言，債息係愈長應該愈高，因為長債靈活度低，風險相對較高。市場關注倒掛現象，就係兩年期及5年期收益噚日分別收2.799厘和2.7厘，即係短息高過長息，咁係乜意思呢？即係話預示短期息口高，長期息口會低，點解長期息口會走低呢？答案一個，就係中長期經濟唔好。過去，債息倒掛預示衰退來臨，而且頗為準確，於是個市就窒晒。
短息高、長息低代表經濟前景有陰影，但同時亦反映利息走向趨向平坦，未來加息壓力減低，甚至有可能減息，所以市場點樣反應，都可以有解讀空間，美股走勢咁負面，而且債息周一倒掛，但美股周二先大跌，反映投資者傾向造淡，原因何在呢？最直接當然係美股上上落落，始終仲係喺高位，炒上去唔易，最簡單就係做番低。更加緊要係，聯儲局就快議息，(口依)家大戶沽低個市，都有向聯儲局示意作用。
債息倒掛顯示經濟有衰退風險，但是否即刻出現衰退，中間係可以有改變空間。若然聯儲局大力加息，經濟活動減慢，咁放緩同衰退機會自然大。換轉講，聯儲局若然係息口政策上作出調整，咁唔係無可能令經濟軟著陸，所以華爾街係議息前亮起紅燈，對央行都有示警作用。仲有就係，慣做財經演員嘅特朗普從來都關心股市表現，若然股市不斷跌，他就好有理由出嚟發功，所以美股跌得咁金，都有啲股市大鱷扭計嘅味道。
杜指前晚急插，港股係大彈之後必然受壓，但結果港股跌幅細過美國。係年中時候，港股擺明係弱底，當時美股升、港股小跌；美股小跌，港股大跌。呢個情況係美國中期選舉後開始改變，美股喺選後開始出現疲勞，幾次出現急插，但港股跌幅都能細過美股，呢次情況都相似。以銀行股為例，因為擔心衰退增加風險，兼且息差收窄影響利潤，所以跌幅較為明顯，但港股幾隻銀行股跌幅基本上比美股細，相對硬淨，說明市底有改善。
隔晚美股急瀉，三大指數挫逾3%。恒指裂口低開514點，報26745，是全日低位。恒指自上周五起連升三個交易日，共飆809點，噚日回吐抵銷逾半升幅，但美股杜指之前兩個交易日升400幾點，一個交易日跌近800點就跌凸，港股已算跌得少。國企指數跌150點，收報10756，成交金額僅792億元。美國銀行股下挫，滙控(005) 跌2.64%，收報66.3元，成交榜排第三位。陸羽仁先前都睇淡嘅舜宇(2382) 被大摩指未來45日下跌機會大，收市插7.3%報74元，為包尾藍籌。
世道不明避險金股電股
世道混亂，黃金股升幅不俗。潼關黃金(340) 升26%，報收0.58元；壇金礦業(621) 升19%，報收0.057元；靈寶黃金(3330) 升0.76%，報收1.33元。收益相對穩定嘅電力股亦受追捧，華潤電力(836) 升2.18%，報收14.96元；華能國際(902) 收升1.4%，報5.07元；華電國際(1071) 收升1.44%，報3.53元。
陸羽仁
金融High Tea 舊文
來源 source: http://hdfin.stheadline.com
