【異動尋寶】個市炒乜？ 八個字講哂！（魏力）
港股震一日又再上，由月初低位累飆2,000點，繼續屠熊之旅，26700重熊區殺完，下一個輪到27000，而27260為「雙底」頸線阻力位，預料未來幾百點會戰況激烈，短炒的戰友唔該金睛火眼望實。
一個硬幣有兩面，同一件事放在市場，也有兩個（或
以上）截然不同的解法，視乎資金同市場氣氛。貿易戰未傾掂數、英國隨時「no deal」脫歐、中國外貿急轉直下、房市及消費放緩、美國經濟見頂、政府停擺破紀錄，統統都可成跌市藉口，咁多不明朗因素困擾大市，為何個市仍繼續升？魏力的建議是：信資金流向，不要信理由。理由是事後加上去，真心白銀才具說服力。
美國加息週期近尾聲，聯儲局前主席耶倫甚至話已經加完。市場總是炒預期，依家市場個主題係「加息快完，美金會弱」。美金跌，無錯，港幣都會跌，但會衍生出兩件事：一、資金沽美元，流番去新興市場，去到梗係唔會齋泊，要搵野買博回報，股市舊年跌完一大輪，估值唔貴，自然有錢打主意。二、借美元債的企業（特別係大陸嗰堆），負擔會有所紓緩，無咁易爆煲。
美金跌、人仔係咪升硬？又唔一定。首先，人仔匯價係按「一籃子」貨幣去釐定（官方係咁講），美金（約佔四分一）之外仲有歐元、英磅、日圓、港元（咪即係美金）、澳元等等。美金係跌，但如果其他貨幣升得更多，人仔一樣可以跌。仲有，人仔升太多的話，出口會重傷，加上貿戰傾得成的話，阿爺一定要多買美國貨，令貿易順差收窄，咁會令外匯儲備減少，到頭來人仔一樣係受壓。
咁美金弱、人仔又弱的話，資金就要搵出路，唔能夠齋做定期，股市又係一個不二之選，至少流動性高，話買就買，話閃就閃，容易管理風險。
講咗咁耐，都係希望大家盡快走出舊年「折磨市」的陰霾，趁有得炒好快啲搵番多少。「咁上面睇幾多？」魏力建議逐格睇、逐星期去睇。政治市、政策市交織之下，敢買都唔敢揸（好耐），有糊食就好，仲想點？唔知點揀股？買ETF。
www.facebook.com/2012jason
異動尋寶 - 魏力 舊文
來源 source: http://hk.finance.yahoo.com
