冰說聰明 - 青冰 2019年1月17日
冰說聰明：教育龍頭股浴火重生 - 青冰
中教聯席主席謝可滔（右）及首席執行官喻愷。資料圖片 適中字型 較大字型
今年的投資氣氛，先被一個內地PMI打沉，恒指跌穿25000點，上證低見四年低位2440點，當大家心死之際，貿易談判有進展，中央先降準再漏口風會出政策救經濟，汽車、家電、基建及5G概念紛紛起步，積弱多時的內險也回穩，氣氛逆轉，指數升升嚇已經接近27000點了。
前年最熱炒的四個板塊，手機、醫藥、教育及物管，去年先後受行業低迷及政策打壓，在全面看淡下，今月反而有唔錯的表現，就以藍籌的兩藥兩手機來說，均從低位反彈一至兩成。教育股去年都從高位腰斬，全因8月監管機構發佈意見，阻民辦機構併購義務教育，整個sector暴跌，當日跌得最少都要兩成埋單，自此之後，教育股併購的通告完全絕跡。
近日開始有中外投行放風，話相關的規則將會在今年上半年正式落地，有助消除不明朗因素，恰巧地近日又多了教育股宣佈新的併購，如民生教育（1569）、新高教（2001）及中教（839）。青冰一直都有跟開中教，因為佢係行業龍頭，市值最大收入最多，加上專注高等教育及職業教育，相信同中央著力打壓的義務教育冇咁大關連，唔知係咪咁，佢的跌幅在去年係較少，雖一度從高位跌52%，但都是只限一天大平賣，之後都在9蚊上下徘徊，相對於同業跌了超過一半後仍在低位浮沉，明顯屬強勢。
中教前兩日公佈收購山東省泉城大學，屬省內名校，而該大學剛虧轉盈，亦是公司首次打入人口第二大省山東，潛力優厚。
睇返佢哋上市後已是第四單收購，目標似乎非常明確，就是通過併購而壯大，基金就最鍾意這個概念，所以VP除了手持中教外，仲一齊合作搞教育基金。中教今年累升12%，又剛破中期降軌，雖然估值較同業貴，但炒股買龍頭，畀少少溢價也是值得。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com
