收市閒情 - 千頌C 2019年1月9日
收市閒情：無本生利高高手 - 千頌C
想用錢買教訓？淘寶大把，1至2毫人仔，賣家無本生利，買家願者上釣。 互聯網圖片 適中字型 較大字型
炒股嘅嘢，大家最想嘅無非都係以小博大；不過，歷史話畀我哋聽，以小博大未算高手！真正嘅高手，應該係無本生利Der！
大約十年前，有人就喺App Store推出一隻叫做「I am Rich」嘅App，開賣999.99美金！賣得咁貴，一定物有所值啦？嘿嘿，事實上隻App根本係一個/pp，你開咗佢，只會見到一粒發光嘅紅鑽喺度轉轉轉，然後寫住「I am rich, I deserve it, I am good, healthy & successful.」結果，隻App上架第一日，全球取得了八個下載，最後只有兩人向Apple申請退錢。雖然隻App第二日就被下架，但以7:3分賬計，呢位開發者仍然有4200美元袋袋平安。
講返近啲，Bitcoin、加密幣，呢類理論上係有價值嘅Crypto，前年都炒到癲。作為一個盡責嘅Sell屎，你以為一定要好似幣少咁，用好多錢去買（租）洋樓、買（租）名車，吹到隻幣點有投資潛力？NoNoNo，話說世界上有一隻幣叫Useless Ethereum Token，講到明係廢幣冇價值，開發者仲話，「Seriously, don"t buy it」。不過，上年年頭Crypto泡沫時，呢隻垃圾水漲船高，1粒UET值0.22美元，市值最高見91萬美金，𠵱家最新市值都仲有5.7萬美元。
再講返近啲，大家一齊做一個Exercise：先上淘寶，然後輸入「教訓」呢兩隻字，你會發現，你想買一個教訓，只需要畀1至2毫人仔，講明「童叟都欺，貨真價實」！正所謂願者上釣，𠵱家仲係On-shelf嘅教訓，最高銷量嘅賣出近2,000個，賣1毫嘅即係近200蚊！之前有賣家以2毫賣出近4,000個，0成本變出800蚊人仔！
寫呢三個Case出嚟，其實係想提醒大家，2019年，炒股時，千萬唔好以為貴嘢就一定有好嘢；見嘢炒貴咗，唔知頭唔知路，就衝入去買咗先算，點知發現自己買咗垃圾返來，喊得一句句。不過，所有「教訓」都係願者上吊，輸錢嘅，連淘寶都唔使上，自己真金白銀買咗個教訓返去，日日對住佢。買咗個「教訓」後悔？試嚇放上淘寶，睇嚇有冇人要吧。共勉之。
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.finance.appledaily.com
