Hea富生活 - 郭釗 2019年1月24日
Hea富生活：過癮輸不如悶贏 - 郭釗
領展上市13年，累計升幅8.5倍，仲未計每年派息，加上槓桿的話，實在好過買樓好多。資料圖片 適中字型 較大字型
最近大台有套新劇講老千，其實市面上的金融、地產專家，都有不少被稱為老千，讀者每天閱讀他們的文章，應該如何客觀分析資訊的真偽呢？如果全部視為老千文章，睇完留言謾罵，雖有警世作用，但無疑是浪費時間，如果懂得看，不會中伏之餘，可能還會因片言隻語發掘到黃金。
先談股市，老千最容易在股票市場生存，一些股份連名都未聽過，何來有散戶會入，所以不少公關公司專門尋找有影響力的股評人係咁意提嚇，配合股價異動，以製造山雨欲來之兆，吸引散戶進場，炒高，再散貨，過程當然不是免費啦。更甚者自己有貨或想散貨，唱衰唱好自肥有之。這類文章最受急功近利又不願做功課的散戶歡迎，因唱得出都有幾成機會升一浸，次次中伏仲有人信咩？自命走位靈活的老散都會留意這類文章，但股票市場專收拾叻仔，更何況是自命不凡的叻仔？
較為忠實的評論都不太受歡迎，例如講領展（823）、 新地（016）、恒地（012）等，就肯肯定被稱之為「悶」和歸類為廢文，多數人反應是：「阿媽係女人，使鬼你講？」但往往世事就是賭俠話齋「悶悶哋贏，好過過足癮地輸。」用陰謀論角度看，你估領展會唔會畀錢財演寫好佢呢？領展上市13年，累計升幅8.5倍，仲未計每年派息，加上槓桿的話，實在好過買樓好多，雖然現在發展埋大陸市場，風險的確比以往增加，但都適合未夠彈藥上樓而又要穩定性的散戶積累資本。希望你們識得分辨意見。下次講如何分辨樓市老千。
郭釗
http://fb.com/heaology.edu
本欄逢周四刊出
Hea富生活 - 郭釗 舊文
來源 source: http://hk.finance.appledaily.com
