冰說聰明 - 青冰 2019年2月14日
冰說聰明：摩笛靚吹關鍵在timing - 青冰
大摩吹港交所，一腳踢起了港交所股價4%。 資料圖片 適中字型 較大字型
今星期有兩份大行報告好吸睛，分別係里昂講賭股及大摩吹港交所（388），前者較少人注視，但趣味性高，後者就一腳踢起了港交所股價4%。
里昂的分析員在春節假期往澳門賭場及酒店考察，結論係從訪客人數、最低投注額及目測的客人流量，全部都是向好。目測到永利皇宮每枱都有30人聚集，又數到美高梅（2282）上周五晚有61張吉枱，12頁的報告中，有6版係有圖有真相，影咗港珠澳大橋巴士站、澳門碼頭、各酒店商場及免費穿梭巴士等景況，甚至有幾張好似係偷影賭枱。咁從相中所見，又真係人來人往，逼爆巴士站嘅，2月賭收相信應該都強勁吧。
摩笛吹港交所，洋洋33頁的報告，雖然冇里昂考察澳門咁多花臣，但就製作認真，有數據有理據，結論係港交所會受惠全球資金湧入內地，目標價係340元。佢哋話MSCI或將A股納入比重，由5%增至20%，並加入深圳上市的股份，而富時指數，都會在今明兩年將A股納入，並預期債券通會近千億美元流入內地市場雲雲。究竟從股票及債券流入的資金有幾多，絕對係斷估，大家不需太認真，但青冰就幾信佢哋對MSCI的推算，無他，因為MSCI都係大摩㗎嘛，準繩度應甚高。
港交所創八個月新高，咁旺場好耐冇見過，對上一次可能係去年1月，單月急升60蚊嗰段，但周二35億元成交，竟然冇大手北水手影喎，單看十大，兩邊港股通加埋只淨流入3,000萬元，最有趣的是，摩笛吹響前一天，滬港通仲錄得1.5億元淨流走，當天仲隊到239蚊樓下㖭，由此可見，打骰的仍然是外資。
大摩的報告，講真只係舊酒新瓶，兩個月前出亦講得通，只是份報告應會石沉大海，唔似得今星期咁大反應囉。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com
