內資開局愛5G
2019年02月14日
美股炒白宮同國會達成共識，解決政府停擺威脅。港股初期反應唔大，午前開始跟隨內地造好攀高，結果恒指收市升326點，升幅1.2%，內地上證指數升1.8%。
中金指春節賣樓跌56%
過完年中環茶友講起內地股市向好，有茶友就提出，股
市近期炒放水，但內地樓市似乎仲係處於嚴冬。日前中金發表報告，今年春節假期期間，上海同南京等17個重點城市嘅新樓銷售面積，較舊年春節大跌56%。該行坦言，房地產行業基本面延續加快下跌趨勢，能唔能夠扭轉趨勢，就要視乎市場需求同開發商融資政策走向。茶友最近同大內房商接觸，似乎水緊情況喺春節後更為嚴重，擔心如果樓市氣氛不扭轉，內地經濟谷極都未必上到。
茶友嘅觀察的確值得關注，但同時要留意，就係股市往往走喺經濟之前，而樓市有時仲會再走得慢過經濟。從樓市觀察經濟，有啲似睇雞蛋去觀察隻雞，未必睇到嘢。若然樓市好熾熱，經濟必然唔會差，未來政策必然係收緊多過放鬆。O依家正正係房地產乏力，經濟下滑，市場先炒放水，所以擔心樓市同經濟，唔可以話係虛驚，但股市往往係炒喺經濟止跌回升之前，眼見現實世界同股市表現往往係互相矛盾。
好似大行野村發表報告，預期內地經濟增長，將由首季嘅6.3%預測增長，進一步放緩至第二季嘅5.7%，但跟住就會見底，預料下半年經濟有望逐步復甦，全年經濟增長6%。究竟經濟係咪咁樣就未知，但內地春節消費較冷，內地股市喺春節後卻開始炒見底，內地股市連升幾個交易日，而且升幅都幾大，滬指重上2700關，收報2721點，漲49點；深成指數收報8171點，升161點。
成交大增氣氛轉熱
A股發豬威，帶動恒指高見28533點，一度急升362點，收報28497點，升326點；國企指數收報11199點，漲154點，成交爆升至1210億元。交投上升，令直接受惠嘅港交所(388) 急升2.7%；滙控(005) 收報67.1元，升1.28%；友邦(1299) 破頂，並以高位收市，收報74.5元，升2.05%；三股合力推高恒指113點。
另一隻急升股份係中國鐵塔(788) ，股價再大漲7%，收報1.83元。今年5G概念股相當好炒，內地股民鍾情呢個板塊，炒作理由包括今個月尾嘅世界移動大會(MWC)會喺西班牙舉行。業界估計5G手機將會係新重點。
另外，美國大力打壓華為，內地相信阿爺會大力捍衛呢間龍頭公司力谷5G，所以兩會期間會有政策。5G係共同關注嘅話題，今年大概率要繼續向新基建、大消費，以及前沿科技領域包括5G通訊、晶片、高端裝備等方向推進。
由於內地資金愛炒政策，所以節後市場資金進場，會落注5G股份。好似其他5G概念股中興(763) 創一個月新高，高見18.72元，收升7.6%，報18.08元；長飛光纖(6869) 收彈7.5%，報27.35元；京信通信(2342) 收升3.88%，報2.14元。
5G概念板塊有唔少股份，論刺激性肯定未排到鐵塔，但公司勝在市值大，而且夠穩陣。由於公司有國家指定合作嘅壟斷優勢，呢個大餅「實食無黐牙」，內地做電訊嘅企業老總話大家要搞5G，就要幫襯鐵塔，雖然唔會發大達，但間間公司收一筆，條數都相當和味。
鐵塔舊年8月上市，當時公開發售部份超額認購只有0.36倍，公司每股H股定價1.26元，為招股價範圍下限，O依家升到1.83元。當日認購新股1至10手中籤率100%，可以話任買唔嬲，之後仲破過底跌到去1元邊，所以新股有時熱爆未必好，破底低撈隨時執到筍貨。
陸羽仁
金融High Tea 舊文
來源 source: http://hdfin.stheadline.com
