笑到最後 - 高明 2019年2月18日
笑到最後：忙開會？你好OUT！ - 高明
特朗普過去3個月早上11時先開工，「hea做」的結果好過勤力扮工。 資料圖片 適中字型 較大字型
美國新聞網站Axios揭露，原來美國總統特朗普過去3個月早上11時先開工，接近六成時間用來打電話、睇電視及打Twitter等，遠比以往總統連場會議得閒。
特朗普咁樣「hea做」，得出成效係盟友歸邊、中國忙於招架、北韓關係破冰、國內失業率創新低，「hea做」有結果好過勤力扮工，箇中秘訣，高明認為同減少開會有莫大功勞。
全公司最冇生產力嘅人，就係由朝到晚都叫開會嘅人。一間公司請一兩個豬隊友返嚟開會，本來冇乜問題，但開會唔會一個人開，好多時只係為咗滿足個別人士開演唱會嘅夢想，而要村人聽歌，唱歌者冇重點，聽歌者冇心聽，結果不事生產，好正常。
會議、腦震盪等管理學術語，係西方廿幾年前發明出嚟嘅管理學產物，再喺十幾年前經MBA、BBA等課程大舉傳入亞洲。再加埋美劇當道，睇得Netflix多，以為華爾街精英由朝到晚開會，拎住支雷射筆指點江山。可惜華人抄襲西方總係學啲唔學啲，人哋已經玩開會玩到厭，老餅一輩如畢菲特、芒格由朝返工睇書睇到收工；新派Elon Musk取消定期會議、覺得個會無聊就走；再由特朗普示範減少開會工作更有效率。
當然，開會本身有佢嘅作用，例如最冇生產力嘅人要證明自己存在價值，就係不斷召開會議，然後同老細講自己開會好忙。開會後如果工作真係有任何有改善，又可以領功，難怪會議深受遠東管理階層推崇。
其實，中國自古以來有一個良好嘅開會文化，叫「有事啟奏無事退朝」，估唔到要由美國總統示範一啲咁基本嘅常識。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.finance.appledaily.com
