中美談到入肉近協議
2019年02月18日
上周五港股大跌531點，失守二萬八大關同埋牛熊線。恒指收報27900點，大市成交金額1023億元，已經連續三日超過1000億元。
造成港股大插嘅原因，市場有兩個講法，一個係中美貿易談判未見有咩協議；另一個係內地公佈上月生產者
物價指數(PPI)同消費者物價指數(CPI)都差過市場預期。中國1月PPI按年升0.1%，低過預期升0.3%及上月嘅0.6%；1月CPI指數升1.7%，亦低過預期和上月嘅1.9%。
權重股份好似內銀內險股普遍大跌，跌幅高過恒指嘅1.9%，例如建行(939) 跌2.6%；工行(1398) 跌2.4%；騰訊(700) 跌2.3%，的確有內地股份拖累港股下跌之勢。不過，內地上證指數跌得比恒指少，只係跌1.4%。
正在傾諒解備忘錄
上周五收市後，中美貿易談判陸續傳出好消息，國家主席習近平接見美國財長努欽同美國貿易代表萊特希澤。新華社亦發新聞稿講述中美貿易談判，話「中美雙方就主要問題達成原則共識，並就雙邊經貿問題諒解備忘錄進行磋商。」
美國白宮聲明就較中國講法低調，只係話中美雙方討論取得進展，但仲有好多工作要做。美方聚焦喺結構問題上，包括強逼技術轉讓、知識產權、網絡盜竊、農業服務業非關稅壁壘同匯率議題。
美國總統特朗普就話，可能會延長3月1日同中國談判貿易嘅最後限期，同時保持關稅不變，佢補充話談判相當複雜。中國副總理劉鶴將會喺今個禮拜再飛去美國，同美方繼續討論。
中方一直對談判表現得比較審慎，O依家講到達成原則共識，同埋傾緊諒解備忘錄嘅問題，令人覺得中美雙方接近達成階段性協議。中美貿易問題複雜，要傾一兩個月就達成全面協議，幾乎不可能。估計雙方會先簽一份諒解備忘錄，等如一個框架協議，然後慢慢傾細節。
杜指大升433點
美股上周五大幅造好，杜指升443點，升幅1.8%，主因係中美貿易談判會後嘅樂觀消息。摩根資產管理嘅環球市場策略師Hannah Anderson表示，市場對中美貿易談判期望，已經由達成全面協議，轉移到美國政府唔會喺3月1日開始對中國貨品提高關稅。
過去市場希望喺特朗普定出嘅90日限期內，中美可以達成全面協議，O依家轉移到如果美國喺3月1日開始唔加關稅，就意味談判最後會成功。呢個市場焦點嘅轉移，令特朗普較容易搬龍門同宣佈勝利。市場經過近一年貿易戰帶嚟嘅折騰後，如今非常期望雙方可以逐步達成協議。
上周五港股大跌531點，成交都不少，跌得有啲過份。由於港股開市時，中美貿易談判仍未結束，若然話部份跌因係因為談判冇結果，反應有啲過敏，加上中國公佈嘅經濟數字未如理想，的確會影響市場信心。港股近期多數係先跌後彈，唔似上周五咁一沉不起，所以跌200至300點比較正常，跌500幾點就有啲誇張。
談判結束後，市場逐漸傳出比較樂觀消息，上周五夜期尾市反彈近300點，如果今日港股有300至400點升幅，可以將上周五下跌視為震倉，港股強勢未變。相反，如果今日市況疲弱，咁就要小心啦。由於港股此前連升六周，我傾向認為上周五大跌只係震倉。
部份行業或受影響
大家都期望中美可以先簽一份諒解備忘錄，然後傾多一至兩個月，就可以達成全面協議。雙方接近簽諒解備忘錄，當然係好消息，但都要小心中美達成協議後對個別行業嘅影響。談判要達成協議，中國勢必要大量增購美國貨、減少對某啲行業嘅補貼，同埋向美國產品及服務開放市場。
有傳中美討論嘅其中一個項目，係中國唔可以再對國產電動車作大幅補貼。中國一直對購買國產電動車嘅車主有較大補貼，一架十幾萬嘅電動車也補幾萬蚊。若然雙方達成協議，中國要取消補貼嘅話，對中國電動車股會造成很大影響，例如主要製造電動車嘅比亞迪(1211) 。
另一個行業係半導體，雖然大家預期中國會大幅採購美國農產品好似大豆，同埋石油、天然氣等天然資源，但美國顯然唔會滿足喺呢啲比較低端產品嘅採購。據聞雙方有討論半導體產品，美國希望中國大幅增加採購美國半導體，中方就提出反建議，希望美國公司將設喺馬來西亞同墨西哥嘅半導體工廠搬到中國，中國先會大量採購。
對此，美國懷疑咁做會有強逼技術轉移嘅問題，雙方喺呢個問題上仍有爭拗。萬一中國真係大幅增購美國半導體，將會對半導體股有影響。總括而言，中美如果能夠達成貿易協議，中國增購美國產品之餘，會對美國產品同服務開放市場，對部份內地行業會有衝擊。
雨潤炒出冊概念
另一方面，有啲股份嘅升跌，未必同市場環境有關，更多係受企業內部因素影響，豬肉股雨潤(1068) 就係一個好例子。雨潤多年以來，股價一直低迷，但係最近大半個月，股價就狂升一倍有多，由0.6至0.7元嘅低位，大升至上周五的1.65元，單喺上周五已升3.1%，當日成交亦都大增，金額達到5630萬元。
再睇基本分析，近期內地出現豬瘟，若然中美有協議，美國輸入嘅豬肉產品將會增多，對內地豬肉商構成更大競爭，按道理，豬肉股應該無運行，雨潤股價就暴升，歸根結柢，原來係雨潤嘅名譽主席兼董事會高級顧問祝義材，俾人羈押咗1400日之後，終於出獄。雨潤喺1月22日發表通告，話收到祝義材家屬通知，祝義材「已回到家中」。
故事要由2011年講起，當年5月，雨潤被發現產品含有「瘦肉精」，又被指使用過期豬肉製造香腸。同年6月，渾水發表沽空雨潤報告，媒體質疑雨潤大幅圈地擴張，推高產能數字，以騙取政府嘅巨額補貼，觸發好多證券行下調雨潤評級至「沽售」，雨潤股價大跌，之後幾年雨潤一直風雨飄搖。
2015年，祝義材被監視居住，高級管理人員大量流失。雨潤股價由2010年嘅33.7元高位，幾年直插無水花，跌到得番一蚊都唔夠。雨潤由於業務虧損，資金不足，公司出現債務危機。截至2018年6月30日，雨潤未償還債務高達73.3億元。
祝義材放監，雨潤領導回歸，市場炒作雨潤可以翻生，一個炒作方向係祝義材會將雨潤食品賣畀國企，或者希望成為業務多元化嘅內房集團；另一個方向係祝義材重新出任雨潤董事長，搞好豬肉食品經營，並且集資解決債務問題。
雨潤可以話係一隻「煙頭股」，暴升之後O依家嘅市帳率都只係得0.38倍。然而，雨潤的確係一條「鹹魚」，要賭鹹魚可以翻生，自然有相當風險。炒「出冊」概念並唔常見，要炒嘅話，定10%止蝕是基本保命符。同時亦都要記住，即使定咗止蝕，都未必執行得到，都係以小注玩玩宜情就算啦。
陸羽仁
金融High Tea 舊文
來源 source: http://hdfin.stheadline.com
