收市閒情 - 千頌C 2019年2月20日
收市閒情：環保紅色「跑車」幾時有 - 千頌C
香港1.8萬架的士，有三分一都車齡超過15年，但香港現時係冇設的士退役車齡。資料圖片 適中字型 較大字型
「紅色的跑車像是帶著神秘」，每一次你喺街截一架的士，就係一場賭博。昨日，我喺街頭，揮一揮手，想拉開車門第一架冚旗的來了，「去邊呀？」「九龍灣」「唔過海呀」。第二架，門都未掂到，佢就走。第三架，你終於上到，司機禮貌周周，點解？因為係用App Call嘅。
大約兩三年前，Uber大舉攻港，令唔少香港人覺得終於有出路，「我終於唔使受的士佬氣啦」。好景不常，的士業界猛烈抨擊下，政府高調拉人，結果Uber少咗好多車，貴咗好多啦。
利申，Uber同的士之間，我都係揀的士，純粹因為的士司機熟路好多。不過，政府既然咁支持的士業界改善質素，但我又未見佢支持到底。
話說，豐田旗下石油氣金豐4座位的士上年停產，本港代理商引入新款混能的士，即係話，未來的士車主要換車嘅，就焗換呢架混能的。不過，原先石油氣的車價大約26萬，新混能的就要32萬。「貴咗咁多，梗係唔換，整得就整啦！」
同政府朋友傾過，現時香港1.8萬架的士，有三分一車齡超過15年！香港現時冇設的士退役車齡，只要過到驗車，話知佢行咗廿年。與此同時，巴士行駛年期係不可超過17年；小巴、貨Van都有15年退役期限。到底係因為「紅色的跑車」硬淨啲？定係因為政府牙力唔夠牌主硬淨？
𠵱家要講為大灣區大局著想，中央公佈《粵港澳大灣區發展規劃綱要》就講到「強化區域大氣汙染聯防聯控，實施更嚴格的清潔航運政策，實施多汙染物協同減排，統籌防治臭氧和細顆粒物（PM2.5）汙染。」𠵱家新車就出咗，仲要係混能，由環保角度出發，作為大灣區其中一個地區，為大灣區人著想，港府好似補貼貨VAN咁補貼又好，立例又好，推動的士車主換更環保嘅車，其實責無旁貸。
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.finance.appledaily.com
