MyGut者言 - 徐家健 2019年2月20日
MyGut者言：加熱煙大戰大話局長 - 徐家健
食物及衞生局局長陳肇始今日會向立法會提交草案禁電子煙，引起社會大眾的廣泛討論。資料圖片 適中字型 較大字型
回歸前，電影世界有南方司令嚇鬼李香琴淩淩漆衣冠禽獸：「你睇嚇啲細路女幾咁細個，呢啲大肚婆個肚幾咁大個，全部係俾佢糟蹋嘅。」回歸後，現實世界有南方局長嚇鬼香港人電子煙無惡不作：「世界上並沒有安全的煙草產品。我們會繼續堅定保障市民健康，保護下一代！」最近，英國醫學界卻發表研究報告，證明電子煙比尼古丁取代療法更有效幫助煙民戒煙。
多得另類吸煙產品興起，去年美國有股評人推薦三隻煙股：Philip Morris International、Altria 及British American Tobacco。又最近，一份名為《Association of Electronic Cigarette Use With Subsequent Initiation of Tobacco Cigarettes in US Youths》的研究報告卻指，接觸過電子煙的年輕人，兩年後吸傳統煙的比例較沒有接觸過的高。保護下一代，要否沽空煙股？
女友Babe嚇鬼陳肇始：「局長講大話，可能係鍾意講大話嘅人先做到局長，而唔係做局長令佢講大話講上癮。局長話電子煙喺美國變咗青少年流行病，但加熱煙喺美國都未流行，香港全禁，加熱煙躺著也中槍。」我撐女友：「根本冇數據話有咗電子煙之後食傳統煙嘅後生仔多咗。電子煙幫煙民戒煙，結論係由嚴謹嘅隨機實驗得出。但係道德原因，總唔能夠隨機畀𡃁仔食電子煙，然後睇佢之後有冇轉食傳統煙。」Babe轉談美股：「所以嗰份報告唔可信，亦影響唔到煙股嘅股價。想保護下一代，都冇理由唔畀煙民用另類吸煙產品戒煙。」我再撐女友：「美國嘅做法係加強監管電子煙銷售、禁止有調味嘅產品，防止青少年濫用。香港啲官，派錢就講針對性，另類吸煙產品就話全面禁，金槍人果然係戲劇大師。」
徐家健
美國克林信大學經濟系副教授
http://fb.com/economics3.0/
本欄逢周三刊出
MyGut者言 - 徐家健 舊文
來源 source: http://hk.finance.appledaily.com
