新世界星閃閃
2019年02月01日
市場短期最關心的兩大議題陸續揭盅。美國聯儲局一如預期唔加息，還話要有「耐性」，而且仲提到縮表問題。
雖然主席鮑威爾無即刻煞停縮表，但就話若然有需要，就會利用聯儲局資產負債表去刺激經濟，呢位主席睇嚟「鷹」風不再，仲有啲變咗「順得人」。
內地PMI初現放水成效
另一邊廂，國務院副總理劉鶴去咗美國開會，會前大家板起面孔，跟住就傳出喺知識產權上大家仲有分歧，有為預期降溫嘅味道。美國政府怕貿易戰觸發股市下跌，似乎仲多過中國。若然今次談判冇結果，美國都要諗計搞到場面好睇少少，以免爆煲，如果呢個推斷冇錯，咁會面將會冇大好消息，但亦冇大壞消息。
除咗外圍之外，要留意嘅係內地公佈嘅一月官方製造業採購經理指數(PMI)，結束連續四個月跌勢，由上月嘅49.4升至49.5，雖然係連續第二個月處於50以下嘅收縮水平，但市場原先估計指數會進一步跌至49.3，咁即係話製造業雖然仍然處於榮枯線之下，但開始反彈，冇外界想像咁差。
新定單指數就微跌0.1個百分點至49.6，新出口定單指數就升0.3個百分點至46.9。
新定單同積壓定單指數持續下降，可以理解為需求仍然有下行壓力，不過數據冇預期咁差，或者反映經濟運行有企穩跡象，特別係出口定單指數微升，可能預示自舊年11月以來嘅出口增速大幅下降開始趨向緩和。
中美談判暫時未有突破，下行壓力紓緩，好可能係中央推出連串維穩措施包括放水嘅效果開始浮現。市場原本擔心中美貿易戰會令內地經濟喺農曆年後急速下滑，阿爺趕喺春節前出手，多少有啲托住經濟嘅味道，如果措施力度未夠，好大機會仲會再加碼。
喺內地數據公佈後，內地股市個別發展。上證指數報2579點，升3點；深成指數報7453點，跌16點。港股走勢比內地仲強，恒指一度重上二萬八關，收報27942點，升299點；國企指數收報11035點，漲138點，成交增至1131億元。整個一月計，恒指累積升2096點或8.1%；國指累積上揚910點或9%。
中美水頭轉增，對新經濟股都有好處，騰訊(700) 曾高見351元，創五個月高位，收市升0.5%，報346元；領展(823) 創新高，高見86.85元，收市升逾1%，收報86元。中資內險股領漲大市，新華保險(1336) 發盈喜，股價飆9.4%，收報33.2元；平保(2318) 繼續追落後，上揚2.6%，收報75.9元；國壽(2628) 升2.3%，收報19.34元。
2019年1月賭收即將出爐，農曆新年旺季下周開展，濠賭股上升。永利澳門(1128) 上季多賺4%，股價漲5.9%，收報19.04元；銀娛(027) 升5.7%，收報54元，為表現最佳藍籌股；新濠(200) 升4%，收報18.22元；金沙(1928) 升3.6%，收報37.3元；澳博(880) 升3.3%，收報8.22元。
銀根轉鬆有利資產股，本地地產股輪流炒，新世界(017) 花錢興建嘅星光大道重開，公司股價應聲彈高2.3%，收報12.3元，距離舊年高位12.72元唔遠，從風險角度算係高位，同時說明有利好因素，公司股價跑贏大市。
星光大道重開推動新世界股價上漲，其實呢個項目唔收入場費，公司出錢牌面無着數。但呢個安排一為神功，二為弟子，整完呢條星光大道後，對集團附近落成嘅旗艦物業VICTORIA DOCKSIDE人流都有幫助，而且令市場聚焦喺呢個大項目。
重頭項目踏入收成期
前身係新世界中心嘅VICTORIA DOCKSIDE重建經年，年前開始陸續建成，寫字樓部份開始提供收益，今年應該到酒店入伙，O依家酒店業務幾旺，呢間六星級酒店應該落成得非常合時。
新世界一向係資產型公司，家底豐厚，但過去負債重，而且資產流轉慢，拖低咗內部回報率。近年公司加強發展業務，加上重建旗艦項目落成，陸續會有新收益提高盈利，踏入收成期。
要留意嘅係，公司之前競投機場嘅商場大項目要做投資。不過，集團資產豐厚，以每股資產值21元，現價12.3元，派息3.9厘計，數字上幾抵買，若然利息轉向平穩，對呢類公司有利，所以股價就趁機向上。
陸羽仁
金融High Tea 舊文
來源 source: http://hdfin.stheadline.com
