冰說聰明 - 青冰 2019年3月21日
冰說聰明：鳳凰賣App為闖科創板 - 青冰
鳳凰衛視旗下在美國上市的鳳凰新媒體，公佈將以35億港元出售「一點資訊」的32%股權，呢單刁值得細嚼。資料圖片 適中字型 較大字型
鳳凰衛視（2008）的節目，戰友們應該好少睇，青冰都一樣，所以對隻股都冇乜興趣，直至早幾星期，佢旗下在美國上市的鳳凰新媒體，忽然公佈將以35億港元出售「一點資訊」的32%股權，才開始刨嚇有冇商機。
鳳凰衛視近年發展令人失望，2013年年賺八億，2017年盈利縮減至2.8億，去年上半年仲要蝕866萬，所以親中央都並非靈丹妙藥，唔可以當飯食，去年9月鳳凰網多個頻道被整改，足足停咗兩星期冇更新，鳳凰新媒體大受打擊，致剛公佈的全年業績，錄得近920萬美元虧損。
本業就乏善足陳，不過單刁就可以細嚼。「一點資訊」這個內地新聞App都搞得唔錯，年頭做完融資之後，已劍指內地科創板上市，不過一直未解決VIE架構問題，唔拆就只可以上新三板，要拆除VIE就必須要境外股東割愛沽出股權。雖然早幾星期鳳凰衛視的通告中，沒有明言買家是誰，但相信都是屬於內地註冊的公司或基金吧。換言之，出售完成後「一點資訊」就可以闖科創板了。鳳凰新媒體此舉係成人之美，亦可能是國家任務，不過佢哋仲保留了5%股權，日後若炒到飛天，仲可以食尾糊。
鳳凰新媒體在周二業績後電話會議中，被多次追問完成出售後會否派息，管理層話都想跟股東分享成果，仍在考慮中。鳳凰衛視現持鳳凰新媒體逾5成股權，袋咗35億元，佔一半權益都已經17.5億元，現時鳳凰衛視市值只係48億，現價含金量極高，股價早前好興奮咁炒到上1.12，今星期回吐至0.88，整固應已完成。
單刁的deadline是在本周五，落實交易後就知真正特殊收益，有實際數字後相信就唔係呢個價了。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com
