金手指 - 孫柏文 2019年4月9日
金手指：難怪機場變疫區 - 孫柏文
香港機場啲洗手盤全部用「環保」水龍頭，水壓低，難徹底清潔雙手。 資料圖片 適中字型 較大字型
孫柏文由當年出國留學開始，每次搭飛機都有個習慣，就係一步出機艙，就會急急腳行去最近嘅廁所洗手。相信大家都知機倉菌好多，不過大家可能唔知嘅係最汙糟係每架飛機嘅水箱，所以飛機上洗手唔知會唔會越洗越多菌。
點都好，成個董建華政權，我最buy就係董太嗰句「記得、記得、記得。洗手、洗手、洗手」去防社區爆發疫情。董太作為前護士，洗手防疫係全球各地政府知道嘅道理，只係行政上做唔做到。
對上一年，我去過英國、意大利、西班牙、荷蘭、奧地利、馬來西亞、以色列等地。全部清一色都係喺機場呢啲病從口（岸）入最高危嘅位，洗手水壓超強，可以用番𤩹徹底洗手。當然，深圳嗰啲關口冇番𤩹，不過大家唔好覺得佢哋落後，呢個全因強國人底子比全世界人強。
唔知點解，香港機場啲洗手盤全部都係用嗰啲「環保」水龍頭，弱過小朋友屙尿。幾年前，我同自己講過，機管局屈服於環保膠之下，遲早爆疫情。今日，不幸又中。如果機管局想做啲嘢，就應去例如灣仔街市嘅公廁（去男廁，因我唔知女廁點），睇下咩叫proper嘅洗手水壓。
最後，今次香港爆麻疹疫情，應該對股市唔會有2003年沙士嗰次嘅影響。不過點都好，大家去到機場時，都要記得要洗手。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com
