Can Bank - 散子 2019年4月9日
Can Bank：樓市想跌都幾難 - 散子
大陸嚴厲打擊逃稅、走資，香港在地理上有優勢，好多大陸人設法變做香港人，令住宅需求增加，樓市想跌都幾難。 資料圖片 適中字型 較大字型
市場對於樓市未來升跌再有「 新」預測，今時今日市場已經一面倒預計未來樓市繼續升，對於筆者嚟講，方向已經唔重要，重要嘅係樓市上升嘅動力係乜嘢。
結果又係加息周期完結、美國唔再收水、土地供應不足之類嘅陳腔濫調。不過最近筆者聽過一個做稅嘅朋友講一個理由，真係幾有說服力，不得不同讀者分享一下。
近年樓市上升，大陸人來港買樓可以話係其中一個主要動力，為逃稅又好，走資都好，大陸嚴厲打擊之後，雖然要走資總有方法，但點都會有一啲影響。
大陸個人所得稅徵稅，只要於中國境內居住滿183日嘅個人，需要從中國境內及境外收入都要交個人所得稅，問題在於這183日點計，以前計法，就算即日走都好，都計一日；不過，作為大灣區一份子嘅香港，就有唔同嘅待遇。
特首林鄭上個月開完大灣區會議之後，就話個人所得稅嘅日數計法，以逗留24小時為一日，但國務院副總理韓正嘅講法就係即日來回唔計，雖然未有統一嘅講法，不過，在地理上嘅優勢之下，自然都有更多非港人想變做香港人，對住宅需求亦都會增加，樓市想跌都幾難。
散子
http://fb.com/ 散子-257101397966975
Can Bank - 散子 舊文
來源 source: http://hk.finance.appledaily.com
