大棋局 - Mr. Tregunter 2019年4月9日
大棋局：香港難再獨善其身 - Mr. Tregunter
香港長期作為中國一個缺口，過去的情勢畀你自出自入作為轉圜與搵食之地；一旦情勢有異，中國可以隨時收網。 資料圖片 適中字型 較大字型
人係會因著過去的教訓而做相反之事。中美貿易戰已去到斟酌條款階段，準備埋尾。白宮首席經濟顧問庫德洛在《基督教科學箴言報》舉辦的一場活動上表示，中國在談判中首次承認竊取智慧財產權、強制技術轉移及電腦黑客攻擊等指控。即係話中國幾乎全部認頭，以換取和談，只剩下改革國企及政府貼補一瓣。
日本經濟爆煲後迷失20年，其中一大因素係有錢佬走出去後冇返轉頭。據日本財務省數據，日本2017年海外淨資產328萬億日圓，係連續第27年海外淨資產第一國，連第二都未試過。27年前也就係日本經濟爆煲之時，樓喪炒，可以抵押借更多錢；日圓狂升，可以換更多外滙。兩樣夾埋，有錢佬睇到價差，於是紛紛滙錢出外收購海外資產，將錢留在外，債留在內，結局係一爆就20年不起。
殷鑑不遠，中國一直唔敢畀人民幣大升，近年各種新措施防止大企業有錢佬大規模將錢送出去。今日中國最有錢的人，邊個冇美國綠卡、加拿大護照、香港身份證？圍師必闕，以防敵人冇生路拼死一戰，然後在缺口外再埋伏，逃出來之人已無戰意就容易拿下。香港長期作為中國一個缺口，過去的情勢畀你自出自入作為轉圜與搵食之地，充份利用；一旦情勢有異，其實可以隨時收網，你以為走咗出嚟，其實仍在五指山。
情勢有異 中國收網
貿易戰開波，孟晚舟事件，中美兩國都越來越多夾硬嚟動作。當夾硬嚟越來越頻密，代表雙方已冇時間去柔性引導。香港係食四方飯之地，長期相對於內地擁有獨特地位，乃國際情勢使然，並非必然。《逃犯條例》有收網之用，在港外資亦相當顧慮。如今國際情勢有變，貿易戰縱然和談，只代表第一階段完結，第二階段開始。
中美上一戰，美國利用中國急欲推人民幣入SDR之願，將人民幣滙價定格在高位；今次貿易戰，再逼中國唔可以貶值。中國極力避免重蹈日本覆轍，兜兜轉轉卻走入十分相似境地。當中國貿易順差大減，就需要在其他地方賺外滙；當外滙儲備下跌至一定程度，政府就失去滙率控制權。無論蘇聯、日本、97年亞洲各國，動盪臨界點都在政府失去本國貨幣滙率控制權。中國很明白這點，所以會更加防範出現上述問題，但防範措施又會引起美國及市場反饋動作。香港難以再抱持獨善其身心態。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com
