大棋局 - Mr. Tregunter 2019年4月2日
大棋局：沒有經濟衰退的世界 - Mr. Tregunter
雖然經濟數據唔靚仔，股市仍然陰啲陰啲升，樂觀睇法係，自美國實施QE後，我哋進入一個沒有經濟衰退的世界。資料圖片 適中字型 較大字型
4月1日愚人節，港股、A股雙雙破近期頂位。美債孳息倒掛，中國歐洲PMI相繼仆直，歐洲要繼續LTRO，美國要提前停縮表。經濟數據唔靚仔，股市仍然陰啲陰啲升，於是一種論調被重提：自美國實施QE後，我哋進入一個沒有經濟衰退的世界，經濟周期已不存在。
美國實施QE後，經濟學界有樂觀與悲觀兩種截然不同睇法，上述即樂觀睇法。樂觀看法主要依據貨幣學派觀點，一切皆貨幣現象。所以有QE後，每當經濟有一點下滑現象，政府就會出手寬鬆。如果經濟跌得急，可以印銀紙，只要銀紙浸到上心口就冇事。因為過去每一次經濟危機其實都係流動性危機，斬倉、追孖展、同業互相追數、銀行擠提，全部都係流動性問題。印銀紙可解決流動性危機為第一層。
擴而論之，冇流動性危機，就冇經濟衰退為第二層。過去一樣資產炒爆後價格會大跌，重頭嚟過，是為周期。但有QE，資產炒爆後政府出手，價格被托住冇得重頭嚟過，所以冇周期。而大數據的發展，令政府可以更精確、更細微地調節經濟，過熱前就開始幫你冷卻，吹淡風時就幫你刺激，經濟活動的波動性被壓縮，冇大上大落，也就冇爆煲冇衰退。
下一波動由石油引發
用中國人嘅講法，不偏之謂中，不易之謂庸，經濟就長期處於中庸狀態。耶倫話佢有生之年唔會再見到經濟危機，應緣於此。
悲觀看法主要依據古典經濟學派觀點，認為有邊際效用問題，周期不會消失。第一日搵個靚女陪你食飯幾爽，第二日搵兩個靚女陪你食飯重爽，第三日搵五個靚女陪你食飯超爽……但慢慢你會麻木，再多靚女投入，你嘅爽程度都難以增加。QE亦一樣。日本比美國更早QE，然而日本長期處於通縮之中，近年先略有通脹回歸跡象。
經濟係人嘅活動，係人嘅活動就會交織出周期。誠然政府管理人活動的學問越來越精細，科技的進步，大數據的發展，有助壓縮經濟活動亢奮與恐懼的波幅。波幅被壓平與周期消失是否同一件事？值得諗諗。至於周期又點嚟？小至人體內的循環，大至星體的運行，都有周期。若要尋根究柢，以有限所識只想到粒子自旋，會否有關？
中美貿易戰近尾聲，由貿易戰引發的波動也近尾聲。下一個波動會由石油引發，NOPEC法案，被塵封的名詞「石油七姊妹」，將陸續出現於觀眾眼前。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com
