操盤手札記 - 割柑人 2019年5月21日
馬上成為壹會員
會員註冊/登入
【操盤手劄記】吼港版人造肉股 - 割柑人
日清食品首席執行官安藤清隆（右二）。 資料圖片 適中字型 較大字型
外資撤退！中美貿易戰升級，人民幣中間價連跌8個交易日，離岸價低見6.9514，一旦破七，恐會觸發信心危機，引發資金逃亡，不利中港股市。事實上，5月至今，外資流出A股淨額，已達388億元人民幣。
人民幣貶值，中港股市下跌。周一，A股跌0.4%，港股跌0.6%，跌幅算溫和，皆因國家隊力托A股守2月上升裂口頂部，港股亦掹一掹，但已連續兩日失守28000關同250天線，若連續三日失守，將會確認跌勢，短期或要下試原雙底頸線27260。
美國農業部數據顯示，喺美國宣佈對中國貨品關稅加碼嗰個星期，中國取消3,247噸美國豬肉訂單，打反制牌。去年中，中美貿易戰開打後，中國轉買俄羅斯豬肉，卻傳入非洲豬瘟，如今31個省市淪陷，豬肉短缺。雖然唔食豬可以食牛羊雞鴨鵝，但近日網傳中國又爆發牛瘟。
咁唔食肉可以食齋，王岐山講過：「中國人吃草可以活一年。」之但係，今年初，「草地貪夜蛾」嘅幼蟲「秋行軍蟲」（Fall Armyworm），由緬甸傳入中國雲南，啃食稻米、大豆、玉米等超過80種植物，連草都食，如今13個省市淪陷。
豬瘟、牛瘟、蟲災，分別由俄羅斯、蒙古、緬甸傳入，「一帶一路」成為「糧食殺手」入侵之路。不過，又唔使太擔心無嘢食，「人造肉第一股」Beyond Meat月初喺美國上市，兩個半星期，累升兩倍半。其實港股之中，亦有人造肉概念股！
中國證券商國盛，近日就點名日清（1475）具人造肉概念，皆因母公司日本日清喺3月時夥拍東京大學宣佈，成功利用牛肌肉細胞培養人造牛排。由於本港上市嘅日清負責中港澳銷售，未來有望受惠。不過，人造肉股炒味頗濃，想入貨都要睇定啲。
割柑人
本欄逢周二刊出
操盤手札記 - 割柑人 舊文
來源 source: http://hk.finance.appledaily.com
