大棋局 - Mr. Tregunter 2019年5月21日
馬上成為壹會員
會員註冊/登入
【大棋局】美國露牌 中國鋤價 - Mr. Tregunter
特朗普最後一刻計錯數，放風可以再傾一個月，結果被中國摸到底牌，貿易戰原來有價講。 資料圖片 適中字型 較大字型
貿易戰進入最精彩階段，關鍵轉折位，係特朗普最後一刻計錯數。當中國在談判埋尾之際要求修改協議，特朗普厲言冇可能並加中國關稅，但旋即又放風可以再傾一個月。就係呢一下，被中國摸到底牌，貿易戰原來有價講。
問題出在，貿易戰開波之初，中方完全不確定美方意圖。由關稅、中興事件到美國副總統彭斯發表演說，都在營造美國要開中國拖，步步進逼。於是中國由亮劍、勿謂言之不預到低調處理，辟君三舍。結果中國最後一下偷雞，摸到有價講，那美方前面所鋪排的一切，就變成虛張聲勢。因此可以看到，中方立即轉變態度，輿論鋪天蓋地反擊。中國並非要談判破裂，而係要鋤最後一口價。
此所以為何貿易戰之初，估計大機會如小牧．長久手之戰發展，蓋形勢太過相似。豐臣秀吉一方勢力比德川家康強太多，乃致豐臣秀吉以為食硬。德川家康的應對方法，係不正面接戰，一直拖延，然後在拖延期間猛搵對方漏洞，不斷奇襲。結局係豐臣秀吉要啃，啃德川唔落；要退，又不能退，最後只能放下身段和談收場。
現時反枱冇著數
此次貿易戰最巧妙的地方，係特朗普視為一場談判，運用其引以自豪的談判技巧去同對家砌；而中國，由於關係到國家發展前途，視同打仗，用嘅係戰略。於是出現當下情勢，特朗普以為食硬，點知臨門一腳反抽。然而美國總體上強勢，主導全球各種規則秩序，中國當下要反枱不太可能。縱使雙方擺出各種姿態貌似就快要斷交咁款，但從客觀情勢上看，現時反枱冇著數。真係要反制，就會係等美國經濟出現衰退時。
特朗普有太多戰線要開，下一屆總統選舉，加息周期完結，美國晉身原油淨出口國，此三者時間軸的銜接點，都在2020年前後。所以貿易戰係一個金剛圈，貿易條款係一道緊箍咒，用嚟笠住中國限制其活動，以便準備中東石油戰略。貿易戰拖得越久，美國要開新戰線的空間就被壓縮。俄羅斯對此十分明白，當被問到點睇中美貿易戰，俄羅斯話關我鬼事。
特朗普上任後學列根，吹到要搞太空軍事；習近平亦模仿毛澤東，間唔中擺政治姿態。但現在不是1983年，更不是1950年。呂布佔據下邳後，曾予書莒城蕭建講過一句話：布雖非樂毅，君亦非田單。中美要掰面，時辰未到。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com
