智取大市 - 晉佳 2019年6月10日
【智取大市】中國永續金融體系 - 晉佳
喺中國，越接近某種核心或大到不能倒嘅體系，唔理債務係幾多，反正都有條件無限再融資無限續期。 資料圖片 適中字型 較大字型
蕭生講到內銀爛賬問題，引嚟網民關注。中國、內銀嘅命運基本上聯成一線。對於中國債務，各界有好多非完全統計，就以其中一種講法債務高達170萬億人仔為例，多過美國國債規模嘅21萬億美元。
唔理乜債都好，越接近某種核心或大到不能倒嘅體系，債務話係幾多年期基本上都係多餘，反正有條件無限再融資無限續期。呢類債唔在乎你還唔還到本金，只在乎你每年還唔還到利息，只要一日還到息就唔會爆，話知你本金已大抵蒸發，話明性質是永續，又點會追你還本金呢。
爆煲嘅，永遠係落馬人士或集團，之前安邦、𠵱家肖建華包商銀行咪就係咁樣被接管。你可以想像到點解海航當初要博命做海外收購，當然亦想像到內銀資產質素情況如何，卻又可以頂到今時今日以至可見將來。
的確，每年中國要印夠銀紙、或靠收稅，總之令各個parties有錢每年還息，於是派餅周期是必須出現，當然，中國亦有傑出企業如騰訊（700）、阿里等等去支持。離岸人民幣供應比較貨乾，有利中央貨源歸邊去頂住離岸價，呢種操作係不歸路，亦唔會改變。一帶一路就更厲害，令到咁多國家命運同人民幣聯成一線。講到呢度，呢篇文其實一再執過字眼才出街，點解要咁做，你懂的。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
