冰說聰明 - 青冰 2019年6月27日
【冰說聰明】招行或成下個戰場 - 青冰
貿易談判若再拖落去，金融股或成下一個戰場。招行作為領頭羊，應該會被追住嚟打。資料圖片 適中字型 較大字型
招行（3968）周二開市無耐便急隊，到青冰留意到時已經是跌4%，無論在google及彭博新聞，也找不到似樣的原因，最後戰友通報係因為《華盛頓郵報》的一篇報道，話三間中資銀行在制裁北韓期間，幫北韓洗錢，招行是其一。文中講到好大鑊，直頭當佢係中興（763）及華為翻版，加上招行今年累升逾四成，不少投資者冇理單嘢堅唔堅，食咗糊先再研究。
由於臨近G20峯會及中美兩國元首的貿易談判，這個時候爆單新聞出來，難免令人懷疑係美國想施壓，先作威嚇並拿多一點籌碼，到時反枱傾唔掂，先加你三千億貨品的關稅，下一round就鬱你的金融機構。內地國有銀行係大到不能倒，看似穩陣，不過估值就明顯比招行低一截，究其原因，係因為招行多年來管理優秀，尤以理財業務做得出色，十年以來盈利每年增長，其他大小國有或商業銀行，真係行埋一邊。
增長勁，估值高，亦係外資的寵兒，另一個重要身份，招行A股是富時A50指數的第三大比重，佔7.7%，僅次於平保及茅台，所以周二曾拖累富時A50指數急跌2.6%。本港股民對A50指數並不陌生，因為應該炒過南方A50 ETF（2822）。對於外資來說，富時A50指數期貨，是最活躍的A股股指期貨，成交閒閒地都有二、三十萬張，未平倉平約有六十幾萬張。講到呢度，不禁令人想起，唔通侵侵又想借單新聞搵食？
中興及華為，係國內頂尖的科技企業，所以順理成章變成出重拳的地方，如在金融創新能力的層面，招行及平保（2318）都係領頭羊，好喇，以往領頭羊都是褒獎的意思，高估值都要追住買，但現時卻要提防成為死亡之吻，侵侵追住嚟打，除非本周末兩國元首握手攬攬不計前嫌，否則再拖落去，能加的稅已經加曬，金融股或成下一個戰場。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com
