智取大市 - 晉佳 2019年6月28日
【智取大市】美團7月雙引擎 - 晉佳
美團為未來概念股，是自動駕駛中國最大贏家，應該仲有排玩。資料圖片 適中字型 較大字型
習特會當前，特朗普話將3,000億美金中國進口貨關稅，可以由原本25%降至10%。市場亦傳出話中美將再休戰，設定半年談判期。又話，Intel、Micron照樣繞道向華為供應產品，消息滿天飛，市場恐懼情緒隨即紓緩。
其實禁令對華為以至中國5G打擊程度，真係無從得知，繞道送貨、偷運、乜都好，未來可能繼續有方法去做，大門有幾封閉，視乎美國喺科企施壓同打擊中國5G呢兩項因素之間嘅角力結果。科企知道失去大客華為嘅話，收入減少，長遠仲要將客戶拱手相讓予非美國競爭對手，要付上沉重代價，於是Intel、Micron呢類公司，都設法避開禁令。
中國5G受阻程度有幾大，其實係一個謎，新趨勢下，市況一好轉，對於基金嚟講，始終股要照買。之前提過幾次嘅未來概念股美團（3690），4月至今大成交逐步炒上，其間成交佔公眾持股量近一半，明顯貨源逐步落入強者手中。7月有港股通可南下買同股不同權股份嘅刺激，加上上星期五富時換馬引來單日40億沽空盤，挾淡倉活動一觸即發，股價突破阻力位65蚊之後，衝破埋招股價69蚊並企得穩嘅話，呢間自動駕駛中國最大贏家，應該仲有排玩。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
