金融High Tea - 陸羽仁 2019年7月17日
港鐵受捧因夠穩
2019年07月17日
今年暑假似乎提早降臨，大市成交持續低迷，指數就繼續窄幅波動。中美貿易談判繼續準備重開，講極都未開到會，大家暫時都唔敢太樂觀，內地《環境時報》反駁美國指中國因為經濟增長跌到27年低位後，想加快同美國達成協議的講法，睇嚟兩國談判開局氣氛應該唔會太好。
管理層換班未見異樣
在迷濛鬱悶中，港鐵(066) 股價繼續以慢火煎魚挺進，再創歷史新高，而且仲係連升六日。中環茶友中唔少都有儲入港鐵，現時公司股價創新高，就問是否可以食胡？有持貨茶友就以淡定姿態話，買股賺錢食胡幾時都無錯，但他就不太心急，皆因美國減息，市場資金要找出路，港鐵地產項目踏入收成期，加上公司很多收入屬民生運輸所需，在經濟不明朗但利率前景走軟下，這類投資頗受基金歡迎。股價今年以來走勢反覆向上，似乎貨源逐步落入強者手中。
港鐵管理層最近大執位，主席同行政總裁陸續換將，茶友研判影響，他認為大型企業經營有一定軌跡，人事變動要較長時間，才會發生影響，短期主要按既有軌跡前進。港鐵前行政總裁係財務出身，注重經營效益，加上着重股東權利，雖然任內發生工程風波，但基金信心不變。至於主席馬時亨做過銀行家同高官，領導公司一樣令人有信心。馬時亨曾經披露持有股票，喺風波期間一股都無減持。
至於新管理層中，行政總裁都係港鐵出身，主席歐陽柏權曾經管理過跨國保險公司，熟悉商業運作。政府給予新管理的任務，是加強管理同公司文化，暫時看不到會對經營有好大影響的新政出現，初步睇似乎今次換班順利進行，未見有甚麼震盪。既然現時要找安全投資不易，茶友自己就無需要急於食胡。
茶友話穩陣投資不易尋，例子之一係佐丹奴(709) 發盈警，股價即時下插，而且愈插愈急，收跌11%，報3.04元。根據公司預計，截至今年六月底止中期，股東應佔溢利按年減少38%。溢利下跌主因零售環境疲弱以及中美貿易戰，導致區內市場情緒不佳。早前有股評家曾推介佐丹奴，認為公司盈利穩定而且派息高，睇番往績，過去幾年公司盈利都能保持四至五億元之間，賺錢大部份用作派息。從盈警提供的數字，今年盈利好可能「穿底」，跌破過去幾年上落通道。這些數字主要還是反映六月或之前數字，自從反修例風波以來，本地零售氣氛再滑落，影響今個月開始明顯，之後業績會更差。
佐丹奴收息補唔番
現時佐丹奴息率有成11厘，而且仲無包含特別股息，屬經常性派息，數字看來非常吸引，但這是不是好現象呢？答案是不，因為派息往績數字吸引，皆因股價下插推高回報數據，其實市場覺得來年不能維持，投資者之前入貨，變成收息蝕價補唔番，所以話穩定收益股現在不易尋。佐丹奴過去表現都算穩定，但因為前路未明，所以想食息最好都係等多陣或分段吸納。
大市昨日繼續牛皮，恒指收報28619點，升64點；國指收報10865點，升26點，成交656億元。上周內媒報道網上賭場滲透內地，惹起嚴打聯想，消息被理解為偏好澳門博彩業，博彩股有炒作，銀娛(027) 收升2.9%，收報57.3元、金沙(1128) 升2.4%報57.3元，非成份股的新濠國際(200) 急升4.5%，收報21元；美高梅中國(2282) 升4.3%，收報14.12元；澳博(880) 彈3.9%，收報9.43元。鐵路基建股跑贏大市，將於科創板上市的中國通號(3969) 急漲6%，收報6.13元；中鐵(390) 升3%，收報5.75元；中交建(1800) 揚3%，收報6.9元；中鐵建(1186) 升2.5%，收報9.39元。
陸羽仁
金融High Tea - 陸羽仁 舊文
來源 source: http://hdfin.stheadline.com
