智取大市 - 晉佳 2019年8月23日
【智取大市】人幣之下的假新聞 - 晉佳
喺中國境內，越欠債、權力就越大、人身自由就越小，之所以遊到香港嘅錢，先係屬於自己嘅錢。 資料圖片 適中字型 較大字型
6月時寫過一篇《中國永續金融體系》為題嘅文，提到有分析估中國債務達170萬億人仔，多過美債嘅22萬億美金。不過呢個並非比賽，比較誰多誰少根本冇意思，重點兩個超高債金融體系，都係大到不能倒。你唔接受中國債或美債不能全數變現？兩個國家焗全世界繼續收息，繼續唔使還本金，反正全人類落疊就相安無事。
美債靠稅收去支付債息，而過去10年QE印鈔，去到現時減息，都係為咗壓低債息，而科技壓低生產同中間成本令通脹趨向溫和，亦容許長年低息。即使稅收有波動，只要美債再融資利息低，便問題不大。侵侵想減稅又減息，其實無衝突。美元體系大到不能倒，有賴美元嘅運用多年暢通無阻，跨境消費、併購都係最可靠貨幣，建立嘅係信心。
至於人民幣，道理唔差得遠，分別在於中國債務、人幣更集中喺大陸境內，只要中國人明白每年乖乖還息就過到骨，內銀明知本金唔知去咗邊都冇問題。喺中國境內，你越欠債、權力就越大，之所以遊到香港嘅錢，先係屬於自己嘅錢。深圳、滬自貿區想威脅香港？冇呢個功能就乜嘢都唔使講。靠高壓手段維持金融體系運作下，全中國唔少人明知聽到嘅香港新聞有幾流，身體都要誠實地信以為真了。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
