操盤手札記 - 割柑人 2019年8月27日
【操盤手劄記】中美四戰線硬撼 - 割柑人
中美牌局鬥大，中國以人民幣貶值抵銷關稅，隨時有反效果，例如加速資金外流、引發中企違約。 資料圖片 適中字型 較大字型
禮拜日遊行，警察開真槍！再咁落去，遲早死人……其實已經死咗6個人，係因反修例而自殺嘅。林鄭呢頭話要構建對話平台，嗰頭用水炮車、真槍對付示威者，咁仲點傾？林鄭每次講嘢，都有丁蟹效應，對投資界嚟講，唯一作用只係用嚟炒期指。
香港內有街戰之憂，外有貿戰之患。上周五，中國度咗成個禮拜，終於打出反制牌，對750億美元美國貨加徵關稅；幾個鐘頭後，美國總統特朗普飛牌，反制佢嘅反制，對5,500億美元中國貨調高關稅，仲叫美企撤離中國。侵侵又unfriend大大，改稱敵人。
周一，特朗普放風中方周日致電美方，願意埋枱再傾，聽住先啦！中美牌局鬥大，人民幣兌美元急跌，在岸價同離岸價分別低見7.1487同7.1926。中國以貶值抵銷關稅，「反反反制」美國，隨時有反效果，例如加速資金外流、引發中企違約。
中美除咗三條戰線：貿易戰、貨幣戰、科技戰，仲有一條戰線隱現，就係訊息戰。上周，Twitter、facebook、YouTube相繼封殺一批中國賬號，涉嫌散播香港示威假新聞；與此同時，官媒中新社招標，買Twitter、facebook粉絲，擺明爭奪輿論陣地。
美國此刻清洗社交媒體，估計同大選臨近有關。中美戰戰不休，市場避險為上，中港股市承接美股跌勢，分別撻低1.2%同1.9%。恒指大裂口低開，島形底變島形頂，收25680，若短線未能回補裂口，勢將下破月中低位24899，甚至舊年低位24540。
市況不就，藍籌難逃一跌。當中，三隻保險股平保（2318）、國壽（2628）、友邦（1299）都已放榜，若想吼位低吸，點揀？睇往績表現，以5年股價連同股息回報計，平保總回報195.8%，國壽-9.5%，友邦87.1%，平保跑贏，可考慮分注低吸。
割柑人
本欄逢周二刊出
操盤手札記 - 割柑人 舊文
來源 source: http://hk.finance.appledaily.com
