大棋局 - Mr. Tregunter 2019年8月27日
【大棋局】2020庚子躁動（四） - Mr. Tregunter
每當美元莊家地位受威脅時，美國都有方法冧莊。貿易戰，係一次冧莊之戰。
資料圖片 適中字型 較大字型
中國吹風就快推出數字人民幣。貿易戰訊息紛繁，但只需明白一個核心原理。試想像一下，假如津巴布韋發動貿易戰，阿哥，邊個理佢。但特朗普一句話制裁便會引起市場動盪，其故安在？因為自布雷頓森林體系瓦解後，美元仍然係世界貨幣體系個莊，其他貨幣，都只係閒。
於是美國一句制裁，可以斷你米路。斷米路牽涉兩個層次，其一為結算，全球大部份金錢往來，最後結算係美元；其二為通路，用得美元，就要經過美國銀行體系，要經過SWIFT。所以美國制裁伊朗後，伊朗無論要收還是發美元都極之困難。在這個前提下，中美之爭，美國係食硬中國，尤其人民幣並非國際流通貨幣。中國始終在賭一樣嘢：全球經濟不景氣，各國都需要中國這個市場，賭你美國最後唔敢真正擘面。
但為長期打算，中國一直有做準備。人行支付結算司副司長穆長春話，人行數字貨幣呼之欲出，以往電子支付工具資金轉移，要透過傳統銀行賬戶，而央行數字貨幣資金轉移可以脫離傳統銀行賬戶。就好似Bitcoin，新時代黑社會都要用新科技洗錢。如此則理論上，往後中國要同邊個國家有貿易往來，可以規避美國制裁。現實上，要他國接受人民幣，而肯收人民幣嘅冇幾多國家。
貿易戰係美元冧莊之戰
數字人民幣由央行發行，剛開始只用作小額交易，然而中國一決定做就會擴展飛快。其與Bitcoin等各類去中心化的數字貨幣亦非同一回事，因此去到最後想國際化，仍然要他國信中國政府做嘢講信用，此點自然最有難度。
自布雷頓森林體系瓦解後，美元始終要面對特里芬難題。特里芬難題並非不會出現，而係每次有跡象要出現，美國都有方法將佢搞掂。用淺白嘅講法，就係每當美元莊家地位受威脅時，美國都有方法冧莊。貿易戰，係一次冧莊之戰。全世界用美元，係需要用得舒服。如果用美元會埋下輕易被制裁之枷鎖，去美元化離異之心油然而生，歐洲今年就推出INSTEX系統同伊朗交易。
美元要冧莊，對他國施加壓力；他國受壓力，會埋下反制措施，美國要用更大壓力去箍。重塑國際秩序，不會那麼文質彬彬。中國係今次壓力中心點，一旦暴發的人民驚覺繁華原來曇花一現，注定躁動。分享第四曲，Gregorian《Moment of Peace》。
待續
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com
