【大茶飯】亂局中的兩件事（青冰）
本文因三罷順延一天刊出，望戰友見諒。執筆之時，道指跌緊五百幾點，究竟瞓醒之後，本文見光之時，會是股災的延續，還是大奇蹟日呢？
昨天午市恆指跌777點，真係只能嘆一句天意難違，當然作為香港人，昨天的焦點都主要在三罷及各區的亂局，很自然地，普遍都認為昨天跌市係
全因亂局造成，但其實昨天都發生了兩件事，一大一小，都頗影響金融市場，可能戰友們也看漏了。
大事就係人仔終穿七算，貿易戰急速升溫，本來人仔跌都唔係太希奇之事，但上星期侵侵出tweet搞局，市場仍認定央媽還是想保七，因為即使離岸價CNH已在上周逼近6.98，個人民幣中間定價仲係死守6.9之下，完全偏離市場價，好喇昨天唔知甚麼驅使，忽然將定價定在6.9225，急跌兩百多點，頓時令市場恐慌，止蝕盤湧現，人踩人出現，CNH終破7算，半小時內已高見7.11。事後陰謀論，昨天的焦點全在三罷，不少外資行員工都只能home office，似乎係比較容易鬆懈，被殺一個措手不及。如果有留意內地對匯率的言論，就會發現每當貿易戰升溫，都係話唔會用貶值作武器，但又次次都會貶一浸，究竟阿爺有冇心守七，昨天咁嘅款已經答咗大家。
小事就係，昨天上午傳出內地要求暫定入口所有農產品，唔好睇小這個消息，侵侵講來講去，都係話中國冇守承諾買多啲農產品，如果全面暫停入口屬實，就是一個很壞的訊號，即係話唔傾喇，即管打啦。
究竟一大一小的消息影響港股多啲，還是本港亂局加777記者會多啲，大家可自行判斷，亦都唔會有結論，總之個市就是弱不禁風，有乜風吹草動，都是往下走，不過如果理性啲睇，如果特首講幾句就可以令騰訊(0700)跌逾4%，咁佢嘅暗黑力量都直逼侵侵了，騰訊咁就唔見千三億市值，咁馬化騰哥哥都真係唔想你再出黎喇，唔想花好多錢買保險，更加唔想面對自己不能處理的亂局。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
