冰說聰明 - 青冰 2019年8月8日
【冰說聰明】侵侵的股災tweet - 青冰
侵侵用手指篤幾個tweet，中美港股市隨即出現了一場小股災。 資料圖片 適中字型 較大字型
七月港股投資氣氛極曳，美股卻在七月創過新高，A股雖無甚表現，但都叫做持平。本以為三地股市會在八月繼續各走各路，點知侵侵用手指篤幾個tweet，又將大家連成一線，變了小股災。我加關稅你貶值，你停買農產品，我就指控你操控滙率。
今次的市況跟五月相似，都是由幾個tweet扭轉市場對貿易戰的預期，股市翌日急瀉，而同樣地，四月及七月美股都係向好，大家都預料五月及八月的形勢可以維持。青冰發現侵侵兩次出tweet，都選擇在聯儲局會議之後，分別是5月2日及8月1日，而兩次的股災tweet，就在5月5日及8月2日。眾所周知，侵侵對聯儲局主席鮑威爾不滿，因為鬧極佢都唔減息，好喇今次8月雖減25點子，卻重申純粹係短期措施，而不是減息周期的開始，fake咗市場，亦fake埋侵侵。
鮑威爾話繼續密切注視經濟數據的趨勢，有必要時會果斷出手，即係減息與否，就睇就業及通脹數據，用陰謀論去睇，侵侵發tweet，除了想貿易戰升溫，拿回主導權，打散個股市，製造緊張氣氛，消費信心及經濟數據自然會轉差，出有形之手，令往後聯儲局議息時，減息概率增多。
另一有趣發現，就是兩次搞事，都是MSCI上調A股比重的月份，青冰還記得四月時，大家指望5月底上調A股比重後，內地股市會續強，坊間不少人建議買入南方富時A50 ETF（2822），結果這ETF在5月跌了一成，今次還好，因為七月投資氣氛差，A股亦冇乜火氣，完全冇人提，青冰更懷疑大家已忘記八月會再上調比重啊。
是巧合還是存心玩鮑威爾及A股，只有侵侵自己知，但下兩次開會及11月再加比重，點都要再三提醒自己，小心為上。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com
