冰說聰明 - 青冰 2019年9月19日
【冰說聰明】藉吉舖潮重整零售業 - 青冰
作為銅鑼灣大地主的希慎，股價由6月至今跌咗25%。資料圖片 適中字型 較大字型
話說青冰年少時經常流連銅鑼灣，食飯飲酒唱K乜都有，年紀大了自然少咗夜夜笙歌，但都總會去食飯傾偈。近年的確甚少去了，人太多，餐廳貴之餘，你完全食得出你畀的價錢，有一大截係去了租金。
上周末去希慎廣場食brunch，果然有煥然一新的感覺，人流少，更開心嘅係在Sogo前的交通燈過馬路，終於暢通無阻。
按美聯工商舖數字，今年銅、尖、旺、中四大黃金區域，街舖空置率由去年的5.6%增至6.5%，當中銅鑼灣的空置率高達9.4%，美聯更預測下年四大區空置率會升穿8%。零售業捱唔住，自然會賴落遊行示威，趁機向業主呻減租。但業主們肥咗咁多年，要減幾成租，講出來都冇面啦，你唔租就搵第二個，但當個舖越吉越耐，劈租都未必有人承啊。
上文說，青冰親身見證希慎廣場人流銳減，作為銅鑼灣大地主的希慎（014），股價亦已比業績行先一行，今年累跌17%，6月至今跌咗25%，如果拍埋風眼股新地（016）及港鐵（066）度，明顯跑輸，利家在這次運動相對低調，沒公開評論又冇參加撐警集會，但竟跑輸比飛站封站兼出軌的黨鐵，實在唔公平啊。
平心而論，零售業在逆權運動開始前，已經處於捱打狀態，戰友可以看看上市的零售股，莎莎（178）年頭係3蚊，5月底係2.20元，現價1.71元，硬要計數的話，首五個月跌得仲甘，9月尾將係半年結，剛剛亦宣佈盈警。莎莎未必可代表整個零售業，但應該可代表自由行零售業，花無百日紅，結構性改革才是出路，青冰無能力提出高見，但藥房、化妝品、金舖及錶舖威咗十幾年，亦非市民所需，係時候讓返個位畀香港人行街了，業主們，捱嚇義氣啦。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com
