【大茶飯】豐盛注入最後的拼圖（青冰）
富城集團更多
青冰做咗幾十年人，都住過唔少屋苑，投身社會後住過兩個物業，咁啱都係同一間物業管理公司，個人覺得佢哋營運得不錯，一直都知係新世界旗下的公司，但冇研究過是否在上市公司的業務內，好喇，直至上周五豐盛服務(0331)發通告，宣佈以7億元收購富
城物業管理，先知道此業務從未上市。
如作為內地的物業管理公司，這兩年肯定是炒到癲，你睇碧桂園(6098)及雅生活(3319)就知，內房亦相繼將此業務分拆上市，而營運得比較好的，或者係升得勁的，共通點都係有個內房阿媽，不斷有新樓、不斷有新的地方要物業管理，靠注資壯大，繼續這個高增長故仔。相反香港，似乎唔見有獨立上市的公司，大多數納入在地產股的業務中，相對賣樓，這些收入唔太起眼，想搵條數出來睇亦唔易，近十幾年的新樓全部都有會所，亦會由物業管理公司營運，所以質素高低，業主應該可以睇得見。
寫今篇文章之前，青冰去搵料，睇嚇富城管理緊乜嘢大屋苑啦，可惜發現佢個網頁，已經好多年冇更新，跟住要去佢的母公司豐盛創建，先搵到個集團刊物，睇到旗下公司的一些活動及資料，而豐盛創建就係上市公司豐盛服務的大股東。豐盛創建有機電工程、環境衛生服務及洗衣、園藝、環保科技及物業管理業務，而今次注入的物業管理，已經是最後一個納入的板塊，一家人終於齊齊整整。跟住再睇嚇清潔公司及機電工程啲名，唓，咪就係日日在屋苑見嗰啲囉，咁作為一個新世界的物業，全部用返自己人都好正常嘅。
按通告披露，富城最近三個年度的純利，是5826萬、5630萬及5993萬，係非常穩定，亦都無甚增長，但這個數字，已經可獨立上市，但選擇注資業務而不分拆，似乎是想壯大上市公司吧，因為豐盛服務過去三年的純利，分別是2.25億元、2.37億元及2.48億元，富城拍埋去，絕對係舉足輕重。豐盛自2015年上市後的四個年度，總算派息每年遞增，以息率計，近兩年都可以維持到6厘息，係一隻悶到抽筋但較為穩陣的股份，今次將最後一個板塊拼入，未來應該冇其他注資憧憬喇，只能做一隻安份守己的股份吧。
通告的另一看點，就是披露各業務在市場上的佔比，機電工程排第二，環境衛生服務排第三，住宅物管排第二，市佔5.2%，第一名的有10%，非住宅物管排第二，市佔7.2%，第一的是11.2%，唔知兩者的第一名，是否「人人愛戴」的黨鐵呢？
大茶飯 - 青冰 舊文
來源 source: http://hk.finance.yahoo.com
