【異動尋寶】「貿戰免疫股」逐隻炒（魏力）
政治市飄到無朋友，上午話「暫時唔會用緊急法推出其他措施」(真係仲有人信？)，恒指就挾300幾點；但炒咗個零鐘就無力，收市縮至72點，炒期指牛熊，真係上帝也瘋狂。
戰友請留意，週四(10日)中美貿談第N回就開波，消息指中方將縮窄談判範圍，即係極大
機會無full deal；華府就藉新疆人權問題，將28個實體(政府機構+企業) 列入貿易黑名單，一貫談判前的下馬威。中方認為特朗普受「通烏門」困擾，會在談判時鬆章，所以態度強硬，但距離美國大選仲有一年，特朗普點會咁快投降？魏力大膽預期，今次雙方又係得個吹字，阿爺畀錢增加採購無問題，其他一切免問，咁樣係無得傾。No deal的話，準備本週末再加關稅。
真係奇蹟地有partial deal、而恒指升穿26300的話，到時先再入場未遲，真係挾唔會得幾百點，睇定再入場絕對無壞。
板塊方面，大戶泊向「貿戰免疫股」避險，上週炒完物管、體育股，昨日就輪到醫藥股發威，石藥(1093)大成交破今年大橫行區，上方首個阻力18.4元。石藥為近日新一輪「帶量採購」的贏家，率先破位十分合理，估值仍有再上的空間。
龍頭開車，升勢有望擴至其他藥股，例如翰森(3692)、藥明生物(2269)等等，當中藥明生物有突破橫行區跡象，成交逐增，MACD亦重現牛差，為不錯的選擇，上方阻力為84元。先落口釘，破位再加注未遲。
筆者為證監會持牌人，持有石藥、藥明生物財務權益。
www.facebook.com.hk/2012jason
異動尋寶 - 魏力 舊文
來源 source: http://hk.finance.yahoo.com
