嚟緊周末就過年喇，市面毫無氣氛，鬼咩，年廿五仲放催淚彈，加上年宵乾貨攤位取消、民間年宵不獲發牌、初二煙花滙演取消…
…大陸禁止慶祝聖誕，香港禁止慶祝過年？難怪陳茂波話派消費券無用，大時大節都唔畀人開心消費，點刺激經濟？
上周中美簽署首階段貿易協議，中國承諾未來兩年增加2,000億美元採購，點啃？向美國加單，惟有向別國cut單，以大豆為例，減向巴西、阿根廷買；能源方面，LNG減向澳洲、加拿大買，石油減向俄羅斯、沙地買，貿易問題隨時演變外交問題！
周一，港股喺連升7周後，回吐0.9%，收28795，大市成交連續7日過千億元。恒指出現上升楔形短線調整形態，升軌貼近10天線，一旦失守，20天線亦難守，有機回補1月9日上升裂口28199至28326；調整過後，中線仍上望30000關。
睇番中美貿協，中國除咗加碼採購，另一要點係進一步開放金融市場，包括保險、證券、基金、期貨。呢點其實雙贏，一來外資大行可於中國大做生意，二來對中國股市嚟講，有利更多外資流入。根據協議，4月1日前將放寬外資保險商持股。
友邦（1299）係亞太區人壽保險龍頭，早已打入中國市場，舊年年尾申請將上海分公司改為全資子公司，並將其他大陸分支改為該公司下屬分支。重整架構之舉，獲得證券商如大和、瑞銀、交銀國際等睇好，認為有助促進友邦喺大陸嘅擴張。證券商估計，友邦中國業務嘅新業務價值，最遲明年就會超過香港。友邦股價上周四衝上87.8元，逼近舊年高位88元水平，之後回調，現價84.75元，整固過後，有望突破舊年高位，中線目標為晉身紅底股，跌穿78元止蝕。
割柑人
本欄逢周二刊出
操盤手札記 - 割柑人 舊文
來源 source: http://hk.entertainment.appledaily.com
