農曆新年後首次見面，青冰祝大家身體健康，合家平安。戰友應該明白，抗疫必須要靠自己不能靠政府，因為實在係廢、靠唔住，疫情中既要
為自己健康把關，又要將倉位保住，係非常艱難，只能盡力做。
股市真正反映肺炎影響，應該是上周一開市後，賭股、國內零售及飲食股、航空及旅遊股，逆市跌半成，之後壞消息陸續湧現，全周跌千一點，高低位就千四點，認真嚇人。
災後執倉，當然先要考慮手上股份，是否受疫情所累而嚴重打擊生意，但有時一些細節位，第一下係未必想得到，要去搵最近一份業績睇，再加點聯想力，才可趨吉避凶，醒目嘅在農曆年長假前已經做嘢，現在雖然遲了幾日，但戰友還是走多一步，不要埋怨自己隻股唔關事都要陪跌，其實係關事而自己唔知而已。
舉個例，炒到癲的美團（3690），本身做外賣仔，疫情中理應受惠吖，海底撈（6862）全國停，市民都要食嘢㗎喎，叫外賣變成必然選擇，但戰友未必有留意到，美團暫時最賺錢的，係酒店及旅遊部份，所以都係大鑊。再諗深一層，抗疫期間外賣仔送餐係搵命博，人工貴保險貴，經營成本自然上升，所以條數是否夠頂酒店及旅遊，值得深思。
又睇嚇越秀交通（1052），農曆年前只是微跌，但上周四出咗份12月營運數據，細心看便知大鑊，旗下附屬公司的10個高速公路項目，原來有5個是在湖北，青冰不是公路股專家，沒仔細研究啲路近唔近武漢，話佢大鑊可能係誇張，但肯定都不是小事，公路股的賣點是收入穩派息穩，當收入大受打擊，高息能否維持呢？所以今天追跌係正路。
據師奶戰友報告，在HKTVmall的一丁麵被人掃清缺貨，難怪昨天齊齊爆升，如果疫情持續，戰友可多加留意香港電視（1137）及日清（1475）。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.entertainment.appledaily.com
