資金超充裕而基本因素差勁嘅環境，對於優質資產嘅質素要求低咗，價格搶高咗，與此同時，佔大多數嘅劣質資產就會唔上唔落，甚至不斷下潛，呢個狀況似乎好似武漢肺炎咁感染多個主要市場
，繼續成為今年嘅主調。無錯，肺炎疫情總會過去，總會帶嚟一個反彈，令股份基本因素重返比較正常化嘅水平，但係中美矛盾有可能2月底由華為揭開序幕，想博反彈嘅，始終都係有得震冇得瞓。
之前提過，市場資金係非常之充裕，講緊中央仲係咁放水，先嚟萬億逆回購，之後又MLF接力，仲傳大陸會定向降準，於是搞到肺炎疫情咁大件事，資本市場都頂得住。
肺炎疫情國際化，美股借啲意連埋桑德斯強勢嘅消息打包大跌，弱勢港股又唔見得跌，原因係呢一刻大把市場慘過港股，墊底者大有人在，中港股突然出現咗比較優勢，差，點都好過好差。
反彈正路不過，但升勢可能繼續兩極化，農曆年後物管股、醫療app股、女仔手遊股爆升，睇個勢又再集氣再上。如果追唔落手，就要退而求其次，博美團（3690）向上突破或者係優質周期股包括中建材（3323）、融創（1918）等等。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
