唔靠任何精采畫面，單靠聲音同文字，點樣可以深深打動人？剛剛，Nike為不幸身故的NBA球星高比拜恩做咗個超級簡單、全黑地
反白字、有聲無畫的名為"Mamba Forever"的悼念廣告。淨係耳聽，娓娓道來，也能歷歷在目。從高比高中比賽、到效力洛杉磯湖人勇創81分佳績、告別賽攻入60分光榮作結，更難忘他曾經協助湖人5次奪得季候賽冠軍指環……短短兩分鐘的廣告，不僅紀錄了他的成功故事，更印證了他的「曼巴精神」（The Mamba Mentality）：成功必須打拼，永不放棄，人雖離世，卻留下了永不磨滅的精神力量。
近排，好多人都work from home，日日喺屋企，一定要搵啲好嘢睇。原來，一邊煲飯，一邊「煲劇」都可以殺出另一條血路。除咗上網免費download，仲可以畀月費睇Netflix。聽聞，有啲大公司已經同Netflix傾緊推出免費或減價的員工「煲劇套餐」，等大家可以在家工作之餘，又可以同時得到一些娛樂，一舉兩得。Netflix現時唔趁機上客，仲等幾時？
除咗睇得，仲有聽得。聽聞最近JOOX音樂平台出現咗一些新改變，一切都係由於大家work from home而起。因為大家由朝到晚都開住兼對住電腦，在桌面電腦登入音樂平台比率增加了30%。可能係因為可以全天候播放，隨意隨心，當然由朝聽到晚。估唔到嘅仲有，當中尤以K歌嘅點播增加25%，原來「少出門，多唱K」，真係變成真理。
疫情嚴重，日日除咗睇新聞公佈唔同地方確診數字不斷增加，同埋無奈地接收林鄭帶來不必要嘅新刺激，每個香港人，對於一啲正面嘅「聲色字畫」，絕對不可或缺。
文迪晞
mailto:heyadmen@gmail.com
廣告經綸 - 文廸晞 舊文
來源 source: http://hk.entertainment.appledaily.com
