有些交易，除了用錢，仲可以以物易物。以前聽過在一些收入水平較低的社區，有些義工團體或NGO會搞一些藝墟及
以物易物地攤之類，不用任何金錢交易，只要互相交換一些家裏多出來的東西，甚至乎一些個人專長的服務，例如，你幫隔籬屋陳太個仔補習，佢就幫你剪頭髮或煮飯作為交換。
近排疫情嚴重，人人都唔去銀行，只去行山；唔去商場，只去超級市場；唔去戲院，只睇Netflix煲《愛的迫降》……好多品牌跟顧客之間的接觸減少，關係變得疏離，生意大受影響。故此，當中有好多與營銷有關的員工都變得有點兒投閒置散，又怕被迫放無薪假，更怕被裁員。
可以點？其實，大可以將一些實體店的交易放上網，一於大推online精選散貨場。同時，廣告公司可以集合他們不同客戶的產品及服務，以員工優惠價，放上這個交易平台出售或交換。這個網上交易平台可以有特低門檻、毋須驗身及現身的保險產品、比外間更優惠的年金產品、折完再折除菌洗衣乾衣機、超長2020年內有效來回歐洲機票、半價海洋公園門票、以優惠價預先book定今個聖誕嘅五星級酒店雙人套房及自助餐等等。一方面可以刺激消費、益嚇各公司自己的員工，同時又可以各取所需，畀錢買又得，以物易物又得，有錢冇錢，有心情冇心情，一舉多得。
日本漫畫《鋼之鍊金術師》的名言：「人不付出犧牲，便得不到任何回報；如果要得到甚麼，就必須付出同等代價。」一單交易，唔會唔使任何付出就無端端飛埋嚟。沒有疫情，還可以賣嚇廣告、用嚇KOL、喺商場搞活動，就會有人埋嚟買；現時人人唔多出街、謝絕與人飲嘢食飯應酬、冇心情消費、冇得去旅行，唔去諗嚇一啲「疫市奇招」，啲貨係唔會自己走出門口，跑到顧客手中。
文迪晞
mailto:heyadmen@gmail.com
廣告經綸 - 文廸晞 舊文
來源 source: http://hk.entertainment.appledaily.com
